కాంగ్రెస్-ఈజిప్ట్ మమ్మీ రెండూ ఒక్కటే...

Posted: 07/03/2017 05:42 PM IST

రాష్ట్రపతి ఎన్నికల్లో యూపీఏ ప్రతిపాదించిన మీరాకుమార్ ను కాదని, రామ్ నాథ్ కోవింద్ కు వైసీపీ అధినేత జగన్మోహన్ రెడ్డి మద్ధతు ప్రకటించిన విషయం తెలిసిందే. దీంతో ఏపీసీసీ అధ్యక్షుడు రఘువీరారెడ్డి జగన్ కు ఓ బహిరంగ లేఖ రాశాడు. తెలుగు రాష్ట్రానికి తీరని అన్యాయం చేస్తున్న బీజేపీ ప్రభుత్వ అభ్యర్థికి మద్థతు ఎలా ఇస్తారని, వైఎస్ ఫోటో పెట్టుకునే అర్హత కూడా లేదంటూ అందులో మండిపడ్డాడు. దీంతో వైసీపీ తరపున భూమన కరుణాకర్ రెడ్డి రంగంలోకి దిగాడు.

రఘువీరా లేఖ ద్వారా కాంగ్రెస్ పార్టీకి ఏపీలో కూడా ఒక లెటర్ హెడ్ ఉందనే విషయం తెలిసిందని ఎద్దేవా చేశారు. ఏపీ ముఖ్యమంత్రి చంద్రబాబుతో సోనియాగాంధీ కుమ్మక్కై జగన్ ను జైలుకు పంపిన విషయాన్ని ఎవరూ మర్చిపోరని అన్నారు. అన్యాయంగా జగన్ ను జైలుకు పంపిన నీచమైన చరిత్ర కాంగ్రెస్ దని చెప్పారు. పార్లమెంటు తలుపులు మూసి రాష్ట్రాన్ని ముక్కలు చేసింది కాంగ్రెస్ పార్టీ కాదా? అని ప్రశ్నించారు. ఆ సమయంలో మీరాకుమార్ స్పీకర్ గా ఉన్నారని... అలాంటి వ్యక్తికి రాష్ట్రపతి ఎన్నికల్లో తాము ఎందుకు మద్దతు ఇవ్వాలని నిలదీశాడు.

కుక్కలు చింపిన విస్తరిలా ఉన్న కాంగ్రెస్ ను రెండుసార్లు అధికారంలోకి తెచ్చిన ఘనత స్వర్గీయ రాజశేఖరరెడ్డిదని భూమన అన్నాడు. వైయస్ పేరును ఉచ్చరించే అర్హత కూడా కాంగ్రెస్ కు లేదని తెలిపారు. కాంగ్రెస్ పార్టీకి, ఈజిప్టు మమ్మీకి తేడా ఏమీ లేదని ఎద్దేవా చేశారు. తమకు సలహా ఇచ్చే స్థాయి కాంగ్రెస్ కు లేదన్నాడు.