మామా అల్లుళ్ల జగన్నాటకం : రేవంత్ రెడ్డి

Posted: 10/05/2015 12:12 PM IST

Revanth reddy controversial comments on kcr harish rao telangana assembly issue

టీఆర్ఎస్ పార్టీ మీద విమర్శలు గుప్పించడంలో తనకంటే సాటి ఎవ్వరూ లేరని టీటీడీపీ వర్కింగ్ కమిటీ అధ్యక్షుడు రేవంత్ రెడ్డి మరోసారి నిరూపించారు. నిత్యం కేసీఆర్, ఆయన కుటుంబసభ్యుల్ని టార్గెట్ చేస్తూ సంచలన వ్యాఖ్యలు చేసే రేవంత్.. ఈసారి తెలంగాణ అసెంబ్లీలో జరిగిన ‘సస్పెండ్’ వ్యవహారంపై ఘాటుగా స్పందించారు. గతంలోలాగే ఈసారి తనదైన స్టైల్లో కేసీఆర్, హరీశ్ రావుల మీద వివాదాస్పద కామెంట్లు చేశారు.

సోమవారం తెలంగాణ అసెంబ్లీ సమావేశం ప్రారంభమైన కొద్దిసమయానికే గందగోళానికి తావుతీసింది. రైతుల ఆత్మహత్యల మీద ఇప్పటికే చాలా సార్లు దద్దరిల్లిన సభలో మళ్లీ అదే సీన్ రిపీట్ అయింది. మూడు రోజుల విరామం తర్వాత కూడా సభలో, సభ్యుల్లో ఎలాంటి మార్పులు రాలేదు. దీంతో సభలో గందరగోళ పరిస్థితి నెలకొంది. ఆ సమయంలో శాసనసభా వ్యవహారాల మంత్రి హరీష్ రావు ‘సభ్యుల సస్పెన్షన్‌’ తీర్మానాన్ని ప్రవేశపెట్టారు. దాన్ని ఆమోదించిన స్పీకర్.. వెంటనే మజ్లిస్, కాంగ్రెస్ శాసనసభాపక్ష నేత జానారెడ్డి మినహా ప్రతిపక్ష సభ్యులందరిని సస్పెండ్ చేశారు. దీంతో 'దొంగల రాజ్యం దోపిడి రాజ్యం' అంటూ సస్పెండైన సభ్యులు సభలో నినాదాలు చేశారు. ఇదే క్రమంలో మీడియా పాయింట్ వద్ద మాట్లాడిన రేవంత్ రెడ్డి.. టీఆర్ఎస్ పార్టీ, కేసీఆర్, హరీశ్ రావులపై ఘాటు వ్యాఖ్యలు చేశారు.

రైతు సమస్యలపై ప్రశ్నిస్తున్న ప్రతిపక్షాలను ప్రభుత్వం అణగదొక్కటం అన్యాయమని రేవంత్ రెడ్డి అన్నారు. సభలో ప్రభుత్వం నిరంకుశంగా వ్యవహరిస్తోందని ఆరోపించారు. సభ్యులను మొత్తం సమావేశాల నుంచి సస్పెండ్ చేయడం దారుణమైన చర్య అని ఖండించారు. రైతులను ఆదుకోమంటే సస్పెండ్ చేస్తారా? అని ప్రశ్నించారు. మామా అల్లుళ్లు కలసి సభలో ప్రతిపక్షాల గొంతు నొక్కుతున్నారని ధ్వజమెత్తారు. అసెంబ్లీలో వాళ్లిద్దరూ జగన్నాటకం ఆడుతున్నారంటూ విమర్శించారు. అందరితో చర్చించాక అవసరమైతే తెలంగాణ బంద్ చేస్తామని తెలిపారు.