హోదా కన్నా ప్రాజెక్టులే ముఖ్యం : వెంకయ్య

Posted: 10/03/2015 07:14 PM IST

Venkaiah naidu interesting statements on special status ap projects

ఎన్నికల సమయంలో ప్రత్యేక హోదా ఇస్తామని ఊరించిన బీజేపీ పార్టీ.. ఇప్పుడు అధికారం వచ్చిన అనంతరం దాని ఊసే ఎత్తడం లేదు. ఇటువైపు నుంచి ఏపీ అధికార పార్టీ ఒత్తిడి చేస్తున్నప్పటికీ.. కేంద్రం మాత్రం ఇచ్చేందుకు ససెమిరా అంటోంది. దీంతో రాష్ట్రవ్యాప్తంగా ఆందోళనలు ఇప్పటికీ జరుగుతున్నాయి. కొందరు సినీ ప్రముఖులతోపాటు రాజకీయ పార్టీ నేతలు నిరసనలు, ఉద్యమాలు చేస్తున్నారు. అయితే.. ప్రత్యేక హోదా కంటే ప్రత్యేక ప్యాకేజీల వల్ల ఎన్నో ప్రయోజనాలు కలుగుతాయని కేంద్రం ప్రకటించిన నేపథ్యంలో.. ఏపీ ప్రభుత్వం హోదా విషయమై కాస్త వెనుక్కు తగ్గింది. కానీ.. ప్రత్యేక హోదా కల్పించాల్సిందేనని ఆందోళనలు మాత్రం జరుగుతూనే వున్నాయి. ఇటువంటి సందర్భంలో తాజాగా వెంకయ్య నాయుడు కొన్ని ఆసక్తికరమైన వ్యాఖ్యలు చేశారు.

నెల్లూరు జిల్లా పొదలకూరులో శనివారం (03-10-2015) పర్యటించిన వెంకయ్యనాయుడు.. అక్కడ రూ.3.80 కోట్లతో చేపట్టనున్న 30 పడకల ప్రభుత్వ ఆసుపత్రి నిర్మాణానికి శంకుస్థాపన చేశారు. ఈ నేపథ్యంలోనే ‘ప్రత్యేక హోదా’ విషయంపై ఆయన పలు ఆసక్తికర కామెంట్లు చేశారు. రాష్ట్రానికి ‘ప్రత్యేక హోదా’ కన్నా ప్రాజెక్టులే ముఖ్యమని పేర్కొన్నారు. తొలి ప్రాధాన్యం వాటికేనని స్పష్టం చేశారు. దేశంలో ఇప్పటికి 11 రాష్ట్రాలకు ప్రత్యేక హోదా ఇస్తే కొత్త ప్రాజెక్టులు రాక ఇబ్బందులు పడుతున్నారని ఆయన తెలిపారు. అయితే.. ఆ క్రమంలోనే ఆయన తన తెలివిని వినియోగించుకున్నారు. ప్రాజెక్టులు వచ్చినప్పటికీ.. హోదా కోసం పోరాడదామని, ఈ అంశం నీతీ అయోగ్ పరిశీలనలో ఉందని చెప్పారు. దేశంలో ఆర్థిక స్వావలంబన సృష్టించి సంపదను ప్రజలకు పెంచడమే ప్రభుత్వ లక్ష్యమన్నారు.