‘జగన్ నిప్పంటించుకున్నా.. ‘హోదా’ రాదు’ : జేసీ

Posted: 09/02/2015 03:46 PM IST

ప్రత్యేక హోదా అంశమై ఆంధ్రప్రదేశ్ రాష్ట్రంలో ఆందోళన పరిస్థితులు మరింత తీవ్రమయ్యాయి. ఓవైపు రాష్ట్రప్రజలు నిరసనలు వ్యక్తం చేస్తుండగా.. జనాల్లో మమేకమయ్యేందుకు ఇదే మంచి అవకాశమని భావించిన వైసీపీ కూడా వారి బాటలోనే నడుస్తోంది. టీడీపీ ప్రభుత్వంపై తీవ్రస్థాయిలో విమర్శలు చేయడంతోపాటు నిరసనలు, దీక్షలకు దిగుతోంది. ఇప్పటికే జగన్ ‘స్పెషల్ స్టేటస్’ కోసం ఢిల్లీలో ఓ రోజు దీక్ష చేపట్టిన విషయం తెలిసిందే! దానిపై టీడీపీ నేతలు తమదైన రీతిలో సెటైర్లు వేశారు. భవిష్యత్తులో కూడా వైసీపీ నిరవధిక దీక్షలు చేసేందుకు సన్నద్ధమవుతోంది. ఈ దీక్షలపై తాజాగా జేసీ దివాకర్ రెడ్డి వ్యంగ్యాస్త్రాలు చేశారు.

వివాదాస్పద వ్యాఖ్యలకు కేంద్రబిందువుగా మారిన అనంతపురం ఎంపీ జేసీ దివాకర్ రెడ్డి.. జగన్ దీక్షలను ఆయన ఓ గిమ్మిక్కేనని తేల్చిపారేశారు. అయినా.. దీక్షలకు మహాత్మాగాంధీతోనే కాలం చెల్లిపోయిందని కూడా ఆయన వ్యాఖ్యానించారు. అంతేకాదు.. ఒకవేళ జగన్ పెట్రోల్ పోసుకుని, తగులపెట్టుకున్నా ఏపీకి ప్రత్యేకహోదా రాదని చెప్పారు. ‘జగన్ దీక్ష ఓ గిమ్మిక్కు. ఆయన దీక్ష వృథా. మంత్రాలకు చింతకాయలు రాలవు. దీక్ష చేస్తే పోలీసులు ఎత్తుకెళ్లి ఇంజక్షన్లు ఎక్కిస్తారు. అంతెందుకు.. పెట్రోల్ పోసుకుని తగులబెట్టుకున్నా ఏపీకి ప్రత్యేక హోదా రాదు’ అని జేసీ తేల్చి చెప్పారు. ఈ విధంగా ఈయన చేసిన వ్యాఖ్యలు ఎన్ని సంచనాలకు దారితీస్తుందో?

AS