కాకుల్లా గగ్గోలు పెడుతున్నారు : రోజా

Posted: 09/04/2015 01:54 PM IST

Mla roja controversial comments tdp cash for vote ap assembly

ఎప్పటిలాగానే ఈసారి కూడా వైకాపా ఎమ్మెల్యే రోజా మరోసారి టీడీపీ పార్టీ మీద తీవ్రస్థాయిలో విమర్శలు చేశారు. ఆ పార్టీపై వున్న ఆరోపణల్ని ఆమె తెరమీదకు తీసుకొస్తూ.. తనదైన స్టైల్లో ప్రశ్నలు సంధించారు. టీడపీ నేతలపై సెటైర్లు వేయడం, వారు చెప్పిన మాటలపై కౌంటర్లు వేయడం, ఇంకా పలురకాలుగా తన ఆగ్రహాన్ని ఆ పార్టీపై వెళ్లగక్కారు.

అసెంబ్లీ మీడియా పాయింట్ వద్ద రోజా మాట్లాడుతూ.. రెండు తెలుగు రాష్ట్రాల్లో సంచలనం సృష్టించిన ఓటుకునోటు కేసుపై శాసనసభలో తాము వాయిదా తీర్మానం ఇస్తే.. అందుకు టీడీపీ ఉలిక్కిపడుతోందని రోజా ఆరోపించారు. ఈ తీర్మానంపై టీడీపీ ఎమ్మెల్యేలు షాక్ తిన్న కాకుల్లా గగ్గోలు పెడుతున్నారని మండిపడ్డారు. మరోవైపు ఓటుకు నోటు కేసు కోర్టులో వున్నందున దీనిపై చర్చకు అనుమతించనని స్పీకర్ చెప్పడాన్ని ఆమె తప్పుబట్టారు. జగన్ కేసులపై టీడీపీ నేతలు రోజూ మాట్లాడుతున్నా.. స్పీకర్ మౌనంగా ఉండటం ఆయన ద్వంద్వ వైఖరికి నిదర్శనమని ఆరోపించారు.

ఇక టీడీపీ పార్టీ ఎంతో ప్రతిష్టాత్మకంగా చేపట్టిన పట్టిసీమ ప్రాజెక్టులో ఎన్నో లొసుగులు వున్నాయని, తెరవెనుక డబ్బుల్ని దండేస్తున్నారని రోజా ఆరోపించారు. ఆ ప్రాజెక్టులో భాగంగా దోచుకున్న డబ్బుతో తెలంగాణలో ఎమ్మెల్యేలను కొనడానికి టీడీపీ యత్నించిందని విమర్శించారు. ఆడియోలో ఉన్న స్వరం చంద్రబాబుదా? కాదా? అనే విషయాన్ని స్పష్టం చేయాలని డిమాండ్ చేశారు. ఈ కేసు నుంచి బయటపడే మార్గాలను అన్వేషించేందుకు ఇప్పటివరకు డీజీపీతో చంద్రబాబు 15 సార్లు సమావేశమయ్యారని రోజా అభిప్రాయం వ్యక్తం చేశారు.