ఏం బాబు.. ఆడపిల్ల ఖరీదు రూ.10 లక్షలా?

Posted: 08/06/2015 03:14 PM IST

Ysrcp mla roja controversial comments on chandrababu naidu in rishiteshwari case

గుంటూరులోని ఆచార్య నాగార్జున యూనివర్సిటీలో ఆత్మహత్యకు పాల్పడిన బీఆర్క్ విద్యార్థిని రిషితేశ్వరి వివాదం రోజురోజుకీ అగ్గిరాజుకుంటోంది. ఓవైపు.. ఈ ఘటనపై సిట్టింగ్ జడ్జితో సమగ్ర విచారణ జరిపించి, రిషితేశ్వరికి న్యాయం జరిగేలా చూడాలని విద్యార్థులు కోరుతున్నారు. మరోవైపు.. ఇదే అదును అవకాశమని భావించిన వైకాపా పార్టీ నేతలు మూకుమ్మడిగా టీడీపీ మీద విమర్శనాస్త్రాలు సంధిస్తున్నారు. ఇప్పటికే రోజా ఏపీ సీఎం చంద్రబాబు మీద అగ్గీమీద గుగ్గిలమయ్యారు. నిన్నటికి నిన్న రిషితేశ్వరి కేసును డబ్బులతో సెటిల్ చేయడానికి బాబు ప్రయత్నిస్తున్నారని వ్యాఖ్యానించిన ఆమె.. తాజాగా మరోసారి ఆయన మీద ఫైరయ్యారు.

ఇటీవల రిషితేశ్వరి కుటుంబసభ్యులకు రూ.10 లక్షలు, 500 గజాల స్థలం కేటాయించాలని చంద్రబాబు మంత్రిమండలిలో నిర్ణయించుకున్నారు. ఈ అంశంపై రోజా స్పందిస్తూ.. ఆడపిల్ల ఖరీదు రూ.10 లక్షలు, 500 గజాల స్థలమా? అంటూ ఆమె బాబు సర్కార్ నిర్ణయంపై ఆగ్రహం వ్యక్తం చేశారు. గురువారం రిషితేశ్వరి ఘనటపై నిరసన వ్యక్తం చేసిన రోజా.. ఈ సందర్భంగా మీడియాతో మాట్లాడుతూ బాబుపై మండిపడ్డారు. అధికార పార్టీ అండతోనే బీఆర్క్ కళాశాల ప్రిన్సిపాల్ బాబూరావు రెచ్చిపోయారని ఆమె ఆరోపించారు. ప్రిన్సిపాల్ ను తక్షణమే ఏ1 ముద్దాయిగా చేర్చాలని ఆమె డిమాండ్ చేశారు. రిషితేశ్వరికి న్యాయం జరిగేదాకా తాము నిరసనను విశ్రమించే ప్రసక్తే లేదని రోజా తేల్చి చెప్పారు.

చంద్రబాబు అధికారంలోకి వచ్చినప్పటికీ మహిళలకు రక్షణ లేకుండా పోయిందని పేర్కొన్న రోజా.. మహిళలంటే బాబుకు ఎందుకింత వివక్ష? అంటూ ప్రశ్నించారు. ఏపీ ప్రభుత్వం వ్యవహరిస్తున్న తీరు చూస్తుంటే.. బాబు పూర్తిగా మహిళా వ్యతిరేకిగా మారారని ఆమె అభిప్రాయం వెల్లడించారు. రిషితేశ్వరికి న్యాయం జరిగేలా త్వరగా చర్యలు తీసుకోవాలని రోజా డిమాండ్ చేశారు.