ఆమె నిర్ణయాలు నచ్చలేదు : రాహుల్

Posted: 08/05/2015 05:13 PM IST

Rahul gandhi fires on speaker sumitra mahajan parliament of india

పార్లమెంట్ సమావేశాల్లో కాంగ్రెస్ ఎంపీలు ఆందోళన చేసిన నేపథ్యంలో 25 మందిని ఐదు రోజులపాటు లోక్ సభ స్పీకర్ సుమిత్రా మహాజన్ సస్పెండ్ చేసిన విషయం తెలిసిందే! ఇలా సస్పెండ్ చేయడానికి నిరసిస్తూ కాంగ్రెస్ పార్టీ ఆందోళన చేపట్టింది. ఈరోజు (బుధవారం) కూడా కాంగ్రెస్ నేతలు పార్లమెంట్ ఆవరణలో వున్న గాంధీ విగ్రహం ఎదుట నల్లబ్యాడ్జీలు ధరించి నిరసన వ్యక్తం చేశారు. ఈ నిరసనకు జేడీయూ, ఆర్జేడీ, వామపక్షాలు మద్దతు పలికాయి. ఈ సందర్భంగానే కాంగ్రెస్ ఉపాధ్యక్షుడు రాహుల్ గాంధీ స్పీకర్ పై తీవ్ర ఆగ్రహం వ్యక్తం చేశారు.

స్పీకర్ సుమిత్రా మహాజన్ పై తమకెంతో గౌరవం వుందని, అయితే ఆమె తీసుకుంటున్న నిర్ణయాలను మాత్రం ఆమోదించేదిలేదని రాహుల్ గాంధీ అన్నారు. ఆమె పూర్తి బీజేపీకి మద్దతుగానే వ్యవహరిస్తున్నారని ఆయన అభిప్రాయం వెల్లడించారు. ఈ నేపథ్యంలోనే కాంగ్రెస్ అధినేత్ర సోనియా మాట్లాడుతూ.. ఎంపీల సస్పెన్షన్ పై తమ నిరసన కొనసాగుతుందని స్పష్టం చేశారు. ఈ సస్పెన్షన్ ఎత్తివేతపై తమకు ఇంతవరకు ఎటువంటి సమాచారం అందలేదని ఆమె పేర్కొన్నారు. ఏదేమైనా.. ఈసారి పార్లమెంట్ సమావేశాలు చాలా వాడీవేడీగా జరుగుతున్నాయి.

మరోవైపు.. తాను కాంగ్రెస్ ఎంపీలను సస్పెండ్ చేసిన చర్యని సుమిత్ర తనదైన శైలిలో సమర్థించుకున్నారు. తాను చాలా సౌమ్యురాలినని, అయితే ఎంత మెతకకా వ్యవహరించే తల్లయినా కొన్నిసార్లు కఠినంగా వుండాల్సి వస్తుందని అన్నారు. ఓ పుస్తకావిష్కరణ సభలో ప్రసంగించిన ఆమె.. పై విధంగా మాట్లాడారు.