‘సుష్మాజీ.. మోదీ నుంచి ఎంత తీసుకున్నారు?’

Posted: 08/07/2015 05:18 PM IST

Rahul gandhi questioned sushma swaraj bride lalit modi money scam

ఐపీఎల్ మాజీ ఛైర్మన్ లలిత్ మోదీ వ్యవహారంలో కేంద్రమంత్రి సుష్మాస్వరాజ్ లోక్ సభలో భావోద్వేగ వివరణ ఇచ్చుకున్న విషయం తెలిసిందే! లలిత్ మోదీ భార్య క్యాన్సర్ బారిన పడటంతో ఆమెకు అండగా వుండేందుకు ఆయనకు ట్రావెల్ డాక్యుమెంట్లు ఇచ్చేందుకు బ్రిటన్ ప్రభుత్వానికి సిఫార్సు చేసినట్లు స్వయంగా వెల్లడించారు. తాను అంతకుమించి ఎలాంటి తప్పు చేయలేదని, విపక్షాలు తనమీద అభండాలు మోపుతున్నారని ఆమె పేర్కొన్నారు. ఈ విధంగా ఆమె ఇచ్చిన వివరణపై కాంగ్రెస్ ఉపాధ్యక్షుడు రాహుల్ గాంధీ తీవ్రంగా స్పందించారు.

ఈ క్రమంలోనే రాహుల్ మాట్లాడుతూ.. ‘సుష్మాజీ ఇచ్చిన ప్రసంగం వినేందుకు చాలా బాగుంది. కానీ.. అంతా డొల్లగా వుంది. తన స్థానంలో సోనియా వుంటే తనలాగే చేసేవారని సుష్మాజీ అన్నారు. సోనియా కుమారుడిగా చెబుతున్నా.. సుష్మా చేసినట్లు సోనియా ఎలాంటి పరిస్థితుల్లోనూ చేసి వుండేవారు కాదు’ అని పేర్కొన్నాడు. ఎక్కడైతే దొంగతనం జరుగుతుందో ఆ విషయాన్ని దొంగ చాలా రహస్యంగా ఉంచుతాడని చెప్పిన రాహుల్.. అలాగే సుష్మాజీ కూడా లలిత్ విషయంలో ‘రహస్యం’ పాటించారని ఆరోపించారు. ఆ వ్యవహారంపై సుష్మా స్వరాజ్ కు తప్ప విదేశాంగమంత్రిత్వ శాఖలో ఎవరికీ తెలియదన్నారు. ఆ నిర్ణయం తరువాతే బ్రిటన్ ప్రభుత్వం తన మాటను మార్చుకుందని రాహుల్ పేర్కొన్నారు.

చివరగా.. ‘లలిత్ మోదీ జైలుకు వెళ్లకుండా ఉండేందుకు అతని నుంచి సుష్మ ఎంత డబ్బు తీసుకున్నారు’ అని సుష్మా స్వరాజ్ ని రాహుల్ ప్రశ్నించారు. ఈ విషయం గురించి జాతికి వివరించాలని ఆయన డిమాండ్ చేశాడు. మరి.. ఈయన ప్రశ్నకు బీజేపీ ఏ విధంగా జబావిస్తుందో?

AS