రాహుల్, జగన్ లకు ఆ అర్హత లేదు : చంద్రబాబు

Posted: 08/01/2015 06:13 PM IST

గోదావరి పుష్కరాల నేపథ్యంలో వివాదాలకు దూరంగా వున్న ఏపీ సీఎం చంద్రబాబు.. తాజాగా కాంగ్రెస్ పార్టీ ఉపాధ్యక్షుడు రాహుల్ గాంధీ, వైకాపా అదినేత జగన్మోహన్ రెడ్డిలపై ఒకేసారి తీవ్రస్థాయిలో విరుచుకుపడ్డారు. శనివారం ఉదయం విజయవాడలో మొదలైన టీడీపీ విస్తృస్థాయి సమావేశంలో మాట్లాడిన ఆయన.. ఆ సందర్భంగా ఆ ఇద్దరిపై ఘాటుగా వ్యాఖ్యలు చేశారు.

ముందుగా రాహుల్ గాంధీపై బాబు మండిపడుతూ.. పోలవరం ప్రాజెక్టుపై మాట్లాడే అర్హత రాహుల్ గాంధీకి లేదన్నారు. అనంతపురం జిల్లాలో జరుగుతున్న రైతు ఆత్మహత్యలు పదేళ్ల తర్వాతకాని రాహుల్ కి గుర్తుకు రాలేదని పేర్కొన్నారు. అంటే.. వారి ప్రభుత్వం అధికారంలో వున్నప్పుడు రైతులు ఆత్మహత్యలు చేసుకుంటుంటే ఎందుకు ముందు రాలేదని బాబు అభిప్రాయం వెల్లడించారు. ఇంకా తనదైన శైలిలో ఈయన రాహుల్ పై వ్యంగ్యాస్త్రాలు సంధించారు.

ఇక వైఎస్ జగన్ మోహన్ పై బాబు ఘాటు వ్యాఖ్యలు చేస్తూ.. రాయలసీమకు నీళ్లు రావడం వైఎస్ జగన్ కు ఇష్టం లేదని, అందుకే పట్టిసీమ ప్రాజెక్టుకు ఆయన అడ్డు చెబుతున్నాడని ఆయన అన్నారు. అసలు ఆ ప్రాజక్టుపై మాట్లాడే అర్హత జగన్ కి లేదని బాబు మండిపడ్డారు. నూతన రాజధాని నిర్మించడం కూడా జగన్ కు ఏమాత్రం ఇష్టంలేదని ఆయన ఆరోపణలు చేశారు. ఎవరెన్ని అడ్డంకులు సృష్టించినా.. తాను మాత్రం రాష్ట్రాన్ని అభివృద్ధి చేసి తీరుతానని చంద్రబాబు ప్రకటించారు.

AS