టీఆర్ఎస్.. ‘తాలిబన్ ఆఫ్ తెలంగాణ’

Posted: 08/03/2015 04:03 PM IST

తాలిబన్లు.. ఆధిపత్యం కోసం పోరు కొనసాగిస్తున్న ఉగ్రవాదులు. ఇప్పటికే ఎందరో ప్రాణాలను బలిగొనడంతోపాటు భారీస్థాయిలో ఆస్తినష్టం కలిగించారు. ఇప్పుడు వీరిలాగే టీఆర్ఎస్ పార్టీ వ్యవహరిస్తోందని కాంగ్రెస్ సీనియర్ నేత, మాజీ మంత్రి షబ్బీర్ అలీ సంచలన వ్యాఖ్యలు చేశారు. శిథిలావస్తకు చేరితే చార్మినార్ ని కూడా కూల్చేస్తామని తెలంగాణ ఉపముఖ్యమంత్రి మహమూద్ అలీ చేసిన వ్యాఖ్యలపై ఆయన ఆగ్రహం వ్యక్తం చేస్తూ.. పైవిధంగా మండిపడ్డారు.

ఈ క్రమంలో షబ్బీర్ అలీ మాట్లాడుతూ.. గతంలో ఔరంగజేలు గోల్కొండకోటపై దాడి చేసి అనేక భవనాలను కూల్చేశాడని, చార్మినార్ ని మాత్రమే వదిలిపెట్టాడని గుర్తుచేశారు. కానీ.. డిప్యూటీ సీఎం మహమూద్ అలీ మాత్రం దాన్నే కూలుస్తామనడం దారుణం అన్నారు. ఏ విధంగా అయితే తాలిబన్లు, ఐఎస్ఐఎస్ ఉగ్రవాదులు తమ ఆధిపత్యాన్ని నిరూపించుకోవడం కోసం భవనాలు కూలుస్తున్నారో.. అదేవిధంగా తెలంగాణలో కేసీఆర్ కూడా సచివాలయం, చెస్ట్, ఉస్మానియా ఆసుపత్రుల భవనాల్ని కూలుస్తున్నారని షబ్బీర్ అలీ విమర్శలు గుప్పించారు. ఈ నేపథ్యంలోనే ఆయన పార్టీకి కొత్త నిర్వచనం చేస్తూ.. ‘టీఆర్ఎస్’ అంటే తెలంగాణ రాష్ట్ర సమితి కాదని, ‘తాలిబన్ ఆఫ్ తెలంగాణ’ అని వ్యాఖ్యానించారు. మొత్తంగా చెప్పాలంటే.. టీఆర్ఎస్ అచ్చం తాలిబన్లలాగే వ్యవహరిస్తోందని ఆయన అభిప్రాయపడ్డారు.

ఇదిలావుండగా.. వాస్తుదోషం వుండటంతో సచివాలయాన్ని ప్రస్తుతమున్న చెస్ట్ ఆసుపత్రికి మార్చాలని కేసీఆర్ నిర్ణయించిన విషయం తెలిసిందే! అలాగే.. ఉస్మానియా ఆసుపత్రి శిథిలావస్థకు చేరిన నేపథ్యంలో దాన్ని కూల్చేస్తున్నారు. ఈ సందర్భంగానే పురస్కరించుకుని ఇటీవలే మహమూద్ అలీ.. అవసరమైన చార్మినార్ ని కూల్చేస్తామని పేర్కొనడంపై తీవ్ర విమర్శలు వెల్లువెత్తుతున్నాయి.

AS