తూతూమంత్రంగా బాబు పనిచేస్తూ చంకలు గుద్దుకుంటున్నారు

Posted: 07/24/2015 03:45 PM IST

కేంద్ర మాజీ మంత్రి చిరంజీవి తాజాగా ఏపీ సీఎం చంద్రబాబు నాయుడు మీద తీవ్రస్థాయిలో విరుచుకుపడ్డారు. ఎన్నికల సమయంలో ఆయన ఇచ్చిన హామీలను తుంగలో తొక్కేశారని చిరు ఆరోపించారు. రైతులకు రుణమాఫీ విషయంలో మోసం చేశారని, సంక్షేమ పథకాలు పూర్తిగా అమలు చేయడంలో బాబు విఫలమయ్యారంటూ ఆయన పేర్కొన్నారు. రాహుల్ గాంధీ అనంతపురం జిల్లాలో చేపట్టిన భరోసా యాత్రం సందర్భంలో కాంగ్రెస్ పార్టీ బహిరంగ సభ నిర్వహించింది. ఈ సభలోనే బాబు మీద చిరంజీవి అంతెత్తున ఎగిసిపడ్డారు. బాబుపై చిరు చేసిన కామెంట్లు ఇలా..

* ఎన్నికల ముందు ఏపీ సీఎం చంద్రబాబు ఇచ్చిన హామీలను తుంగలో తొక్కేశారు.
* రుణమాఫీ చేస్తానని అధికారంలోకి వచ్చిన బాబు, ఆ విషయంలో విఫలమయ్యారు.
* రూ.80 వేల కోట్ల విలువైన రుణాలను మాఫీ చేయాల్సింది, కేవలం రూ.7 వేల కోట్లతో సరిపెట్టుకున్నారు.
* ఇచ్చిన హామీలను పూర్తిచేయకుండా తూతూమంత్రంగా పనిచేస్తూ బాబు చంకలు గుద్దుకుంటున్నారు.
* బ్యాంకు నుంచి లక్షన్నర రుణం తీసుకున్న ఓ రైతుకు రుణమాఫీలో భాగంగా కేవలం రూ.8 వేలు మాత్రమే దక్కింది.
* రుణమాఫీ విషయంలో రైతులకు మీరు చేసే మేలు ఇదేనా? అంటూ ప్రశ్నించారు.
* విభజన సమయంలో ఇచ్చిన హామీలను, విభజన చట్టాన్ని అమలు చేయడంలో మోదీ ప్రభుత్వం ఘోరంగా విఫలమైంది.
* రాహుల్ నేతృత్వంలో కాంగ్రెస్ పార్టీ తిరిగి అధికారంలోకి వస్తుందని తాను నమ్మకంగా చెప్పగలనని చిరంజీవి అన్నారు.