హైద్రాబాద్ ముందు అమరావతి ఎంత? : కేసీఆర్

Posted: 07/22/2015 05:21 PM IST

ఆంధ్రప్రదేశ్ రాష్ట్ర ముఖ్యమంత్రి చంద్రబాబు నాయుడు ఎంతో ప్రతిష్టాత్మకంగా రాజధానిని నిర్మించాలని పట్టుదలతో వున్నారు. ఇప్పటికే రాజధాని ఎలా వుండబోతోందో కొన్ని ఊహాచిత్రాలను కూడా విడుదల చేయడం జరిగింది. దీంతో ఏపీ రాజధాని చాలా అద్భుతంగా వుండబోతోందని, ప్రపంచంలోనే ప్రఖ్యాతిగాంచే విధంగా రూపొందనుందని తెలుగు రాష్ట్రాల్లో చర్చించుకుంటున్నారు. ఇక తాజాగా ఈ రాజధాని విషయమై సీఎం కేసీఆర్ తన అభిప్రాయాన్ని వెల్లడించారు. హైదరాబాద్ నగరంతో పోల్చుకుంటే అమరావతి ఎంత అంటూ ఆయన ఎద్దేవా చేశారు.

ఏపీ రాజధాని నగరంపై ఇన్నాళ్లూ నోరు మెదపని కేసీఆర్.. ఇప్పుడు దానిగురించి రెండు రాష్ట్రాల్లో చర్చలు కొనసాగుతున్న నేపథ్యంలో పెదవి విప్పారు. 400 ఏళ్ల ఘనమైన చరిత్ర వున్న హైదరాబాద్ నగరం ముందు ఇప్పటికీ కాగితాలపైనే వున్న అమరావతి ఎంతో గొప్పదన్న విషయాన్ని ఆంధ్రా మేధావులు ఆలోచించుకోవాలని ఆయన అన్నారు. అంటే.. ఎంతో చరిత్ర కలిగిన హైదరాబాద్ నగరమే ఎంతో గొప్పదన్న తన అభిప్రాయాన్ని ఆయన వెల్లడించారు. తనను విమర్శిస్తే సహిస్తానని... తెలంగాణ రాష్ట్రాన్నిగానీ, హైదరాబాద్ నగరాన్నిగానీ కించపరిచినట్లు మాట్లాడితే మాత్రం ఎట్టి పరిస్థితుల్లోనూ ఊరుకునేది లేదని ఆయన హెచ్చరించారు.

తెలంగాణ రాష్ట్రానికి సంస్కృతి, సంస్కారం వుందని కేసీఆర్ అన్నారు. చంద్రబాబు హైదరాబాదును చూసి అసూయ పడుతున్నారని భ్రమలకు పోతున్నారని ఆయన విమర్శించారు. అటువంటి ఆలోచనలు వదిలేసి ప్రజలకు సేవ చేయడంపై దృష్టి పెట్టాలని కేసీఆర్ హితవు పలికారు. మరి.. ఈయన చేసిన కామెంట్లపై టీడీపీ శ్రేణులు ఏ విధంగా స్పందిస్తారో వేచి చూడాల్సిందే!

AS