జగన్ శవ రాజకీయాలు చేస్తున్నారు..

Posted: 07/15/2015 01:03 PM IST

ఎంతో వైభవంగా ప్రారంభమైన గోదావరి పుష్కరాల్లో భాగంగా రాజమండ్రి ఘాట్ లో మహా విషాదం చోటు చేసుకున్న విషయం తెలిసిందే! భక్తుల ఒకేసారి ఎక్కువ సంఖ్యలో పోటెత్తడంతో తొక్కిసలాట చోటు చేసుకుంది. ఆ ఘటనలో చాలామంది ప్రాణాలు కోల్పోయారు. ఇదే అదునుగా భావించిన కొందరు విపక్ష నేతలు.. ఏపీ సీఎం చంద్రబాబు నాయుడిపై విమర్శలదాడి ప్రారంభించారు. ముఖ్యంగా టీడీపీ అంటేనే అంతెత్తున ఎగిసిపడే జగన్ సీఎం చంద్రబాబు మీద తీవ్ర విమర్శలు చేశారు. చంద్రబాబు వల్లే ఆ ఘటన జరిగిందని.. ఆయన ప్రభుత్వం కట్టుదిట్టమైన చర్యలు తీసుకోకపోవడం వల్లే ప్రాణనష్టం జరిగిందని ఆరోపించారు. బాబుపై జగన్ ఎన్నో విమర్శనాస్త్రాలు సంధించారు.

ఈ విధంగా బాబుపై జగన్ విమర్శలు చేసిన నేపథ్యంలో ఏపీ వ్యవసాయశాఖ మంత్రి ప్రత్తిపాటి పుల్లారావు ఆయనపై మండిపడ్డారు. దురదృష్టవశాత్తు జరిగిన సంఘటనను ఆసరాగా చేసుకొని జగన్ శవరాజకీయాలకు పాల్పడుతున్నారని తీవ్ర వ్యాఖ్యలు చేశారు. అపశృతి దొర్లి భక్తులు ఇబ్బందులో పడినప్పుడు ప్రభుత్వానికి అండగా వుండాల్సిన విపక్షాలు.. రాజకీయ లబ్ది పొందేందుకు ప్రభుత్వాన్ని అప్రతిష్టపాలు చేసేందుకు యత్నిస్తున్నారని ఆయన అన్నారు. వీలైతే భక్తుల్ని ఓదార్చాలి కానీ.. అనవసరమైన విమర్శలు చేయడం సరికాదని అన్నారు. ముఖ్యమంత్రి చంద్రబాబు ప్రణాళికాబద్ధంగా ఎంతో చేసినప్పటికీ.. దురదృష్టవశాత్తు ఆ సంఘటన జరిగిందని ప్రత్తిపాటి ఆవేదన వ్యక్తం చేశారు.

ఈ సందర్భంగానే ఆయన చిరంజీవి, రఘువీరా, బొత్సలాంటి నేతలపై కూడా విమర్శలు గుప్పించారు. వారు ముగ్గురు ప్రభుత్వాన్ని అండగా వుంటూ, భక్తుల్ని ఓదార్చాల్సిందిపోయి.. శవ రాజకీయాలకు పాల్పడుతున్నారని దుయ్యబట్టారు.