పిరన్హా మాంసాహారి మత్స్యం

Posted: 09/27/2013 06:45 PM IST

టామ్ బోయలన్ అనే 77 సంవత్సరాల రిటైర్ అయిన వ్యక్తి న్యూజెర్సీ చెరువులో చేపలను పట్టే సరదాతో గాలం వెయ్యగా 10 అంగుళాల చేప అతని గాలానికి చిక్కింది.  ఇదేదో చూడటానికి పిరన్హా లా ఉందే అనుకుంటూ దాన్ని ఆ రోజు రాత్రి ఇంట్లో ఫ్రీజర్ లో భద్రపరచిన బోయలన్ మరుసటిరోజు అక్వేరియమ్ కి వెళ్ళి విచారిస్తే అది నిజంగానే పిరన్హా చేపే కాకుండా దానికో ప్రత్యేకత కూడా ఉందని తెలిసింది.  అదేమిటంటే మనిషి వృషణాలను మరిగిన చేపట అది.

ఆ చేపలు పాకు జాతికి చెందినవని, అవి ఇద్దరు మత్స్యకారుల ప్రాణాలను హరించాయని చెప్పారు.  వృషణాల మెలిపెట్టి లాగివేయటం వలన కలిగిన రక్తస్రావమే ఆ ఇద్దరు మరణించటానికి కారణమని తెలిసింది.  ఈ సంగతి విన్న బోయలన్ షాక్ అయ్యానని, అంతకంటే ఇంకా ఏం చెప్పాలో అర్థం కాలేదని అన్నారు.  పిరన్హా జాతికి చెందినవే అయినా పాకు కి అచ్చం మనిషికున్నట్లుగా పలువరస ఉండటం విశేషం. 

దక్షిణ అమెరికాలోని అమెజాన్ కి చెందిన ఈ చేప ఇక్కడికెలా వచ్చిందా అని ఆ అక్వేరియం యజమానులు ఆశ్చర్యాన్ని వ్యక్తపరచారు.  బహుశా ఎవరో తమ ఇంట్లో ఉన్న చిన్న అక్వేరియంలో పెంచుతుంటే ఇవి బాగా పెరిగి పోవటంతో వాటిని ఇందులో పడేసిపోయుంటారని భావిస్తున్నారు.  పాకు చేపలు చాలా త్వరగా చాలా పెద్ద సైజులోకి పెరిగిపోయి ఇంట్లో అక్వేరియంలో పెట్టటానికి వీలుకాకుండా తయారౌతాయి. 

ఎన్నో చోట్ల ఫిషింగ్ వేడుకగా చేసిన బోయలన్ ఈ అనుభవం చాలా గగుర్పాటుని కలిగించిందని చెప్పారు.  వాటికి ఆ పలు వరస ప్రత్యేకంగా కొరకటం కోసమే కట్టించినట్లుగా ఉందని అన్నారాయన.  పురష ద్వేషిలా మగవాళ్ళ మగతనాన్ని హరించటానికి అలవాటు పడ్డ ఆ చేపలకు అవి చేస్తున్నదేమిటో వాటికే తెలియకపోవచ్చని అన్నారు.

-శ్రీజ