వైద్య చికిత్సలో మరో మైలు రాయి దాటిన విజ్ఞానం

Posted: 09/27/2013 06:01 PM IST

రెండు అడుగుల మేర గడ్డకట్టిన రక్తం శరీరంలో ఎంతటి ఒత్తిడిని కలిగిస్తుందన్నది ఊహించుకోవచ్చు.  అది కూడా గుండెలోకి వెళ్ళి ఉన్నది ఓపెన్ హార్ట్ సర్జరీతో సరిచెయ్యవలసిందే.  కానీ అందుకు ప్రత్యామ్నాయంగా వైద్యులు వ్యాక్యూమింగ్ విధానంలో బయటకు లాగారు.  యుసిఎల్ఏ మెడికల్ సెంటర్ లో ఉపయోగించిన ఈ ఏంజియో వాక్ పరికరం ద్వారా 62 సంవత్సరాల టోడ్ డన్ లాప్ శరీరంలోని బ్లడ్ క్లాట్ ని వైద్యులు బయటకు తీసారు.  ఇది జరిగిన ఒక వారం లోపులోనే ఇంటికి తిరిగి వచ్చేసిన డన్ లాప్ ఇంట్లో తన 9 నెలల మనుమడితో ఆడుకోవటం విశేషం.

టాడ్ డన్ లాప్ మీద చేసిన సి టి స్కాన్ లో ఆయన శరీరంలో కాళ్ళ దగ్గర్నుంచి గుండె వరకు రక్తం గడ్డ కట్టి వుందని, అది ఆయన ప్రాణాలకు హాని కలిగించగలదని గుర్తించారు.  అది వీడిపోయి ఊపిరితిత్తులలో చిక్కుకునే ప్రమాదం ఉందని గ్రహించిన వైద్యులు ఇంత వరకు ఎక్కువగా ఉపయోగించని, ప్రాచుర్యంలో లేని ఏంజియో వాక్ పరికరం గురించి చెప్పగా డన్ లాప్ ఎంత మాత్రం సంశయించకుండా వెంటనే ఒప్పుకోవటం జరిగింది.  ఈ చికిత్స యుసిఎల్ఏ లో డాక్టర్ జాన్ మోరియార్టీ ఆధ్వర్యంలో జరిగింది.

ఈ పద్ధతిలో గడ్డ కట్టిన రక్తాన్ని పరికరాల సాయంతో బయటకు లాగివేస్తూ దాన్ని వడపోయటం వలన ఆ తర్వాత రక్తం ఎక్కువగా ఎక్కించ వలసిన పని లేకపోయింది. 

దీనివలన మామూలుగా చేసే ఓపెన్ హార్ట్ శస్త్ర చికిత్స లో సగానికంటే తక్కువ శ్రమలోనే పని జరిగిపోయింది డాక్టర్లకూ రోగికి కూడా.  ఓపెన్ హార్ట్ లో గుండె ముందున్న ఎముకల గూడును ముందుగా సగాన్ని చీల్చి వాటిని రెండుపక్కలకూ వంచివేస్తేనే కానీ డాక్టర్లకు గుండెకు శస్త్ర చికిత్స చెయ్యటం కుదరదు.  గుండెలో చెయ్యవలసిన చికిత్స చేసిన తర్వాత మళ్ళీ ఎముకలను దగ్గరకు చేర్చి వైర్ తో కట్టి అవి అతికేటట్టుగా చేస్తారు.  దాని వలన రోగికి పూర్తిగా నయం కావటానికి సమయం పడుతుంది.  అలా కాకుండా తేలికగా జరిగిపోయినందుకు, చికిత్స విజయవంతమైనందుకు డాక్టర్ మోరియార్టీ సంతోషాన్ని వెలిబుచ్చారు.  ఇక ఈ విధానం ప్రాచుర్యంలోకి వచ్చే అవకాశం మెండుగా ఉంది.  ఆశించని దానికంటే ఎక్కువ మంచి ఫలితాలు వచ్చాయని వైద్య బృందం తెలియజేసారు. 

-శ్రీజ