ఆత్మగౌరవ యాత్రలో విమర్శనాస్త్రాలు

Posted: 09/03/2013 04:03 PM IST

తెలుగు దేశం పార్టీ అధ్యక్షుడు చంద్రబాబు నాయుడు తాజాగా చేస్తున్న బస్ యాత్రలో వైరిపక్షాల మీద విమర్శనాస్త్రాలను సంధిస్తున్నారు. 

సీట్లు, ఓట్లు తప్ప మరేమీ పట్టని కాంగ్రెస్ పార్టీ ప్రజల మనోభీష్టాలను పట్టించుకోవటం లేదని, ప్రధాన మంత్రిని చూస్తే ఆయనేమో సోనియా గాంధీ చేతిలో కీలుబొమ్మై కూర్చున్నారని గుంటూరు జిల్లాలో పర్యటిస్తున్న చంద్రబాబు అన్నారు. 

వైయస్ ఆర్ కాంగ్రెస్ పార్టీ గురించి మాట్లాడుతూ, విజయమ్మ రోజుకో మాట మారుస్తున్నదని విమర్శించారు.  మాట తప్పము, మడమ తిప్పము అని చెప్పుకొస్తున్నవాళ్ళు కేసులను ఎత్తివెయ్యటం కోసం, బెయిల్ కోసం అన్నిటినీ తాకట్టు పెట్టే స్థితికి వచ్చారని ఆయన అన్నారు.

తెలుగు ప్రజలు ఇబ్బందుల్లో ఉన్నారని గ్రహించానని, అందువలన చావో రేవో వారితోనేనని చంద్రబాబు అన్నారు.  దివంగత ఎన్టీఆర్ ని గుర్తు చేస్తూ గంభీరమైన వాగ్ధాటితో కార్యకర్తలలో ఉత్సాహం నింపుతూ తెలుగువారి ఆత్మగౌరవ యాత్ర అని అన్నందుకు దానికనుగుణంగానే తన కంఠంలో తెలుగువారిపట్ల ఆవేదనను కనబరుస్తూ యాత్రలో ముందుకెళ్తున్న చంద్రబాబుని చూస్తుంటే తెదేపా శ్రేణుల్లో ఉత్సాహం ఉరకలు వేస్తోంది. 

కాంగ్రెస్ నాయకులు సోనియా గాంధీ దగ్గర ఎలా తోకాడిస్తున్నారు, పప్పు సుద్దలాంటి రాహుల్ గాంధీని ప్రధానమంత్రిని చేస్తే దేశం ఎలా వెనక్కి పోయే అవకాశం ఉందన్న విషయాల మీద నిప్పులు చెరుగుతూ, తెలుగు జాతిని విడదీసి తద్వారా ప్రయోజనాన్ని పొందుదామని ఆశిస్తున్న సోనియా గాంధీకి మన తెలుగువాడి ఆత్మగౌరవం రుచి చూపించవలసిన సమయం వచ్చిందనే పంథాలో చంద్రబాబు మాట్లాడుతూ, రాజకీయ ఎత్తుగడలతో కాంగ్రెస్ పార్టీ, వైయస్ ఆర్ కాంగ్రెస్ పార్టీలు ఏ విధంగా నాటకాలాడుతున్నాయో తెలియజేసుకుంటూ ముందుకెళ్తున్నారు. 

-శ్రీజ