దీక్ష చేస్తాం, చేస్తాం, చేసేసాం అయిపోయింది

Posted: 09/03/2013 02:14 PM IST

Formal deeksha by people s representatives

అసెంబ్లీ ఆవరణలో సీమాంధ్ర ప్రజాప్రతినిధులు ఆర్భాటంగా చేసిన దీక్ష ఉదయం పది గంటలకు మొదలై ఒంటి గంట కొట్టేసరికి పూర్తయిపోయింది కూడా.

47 మంది సీమాంధ్ర ప్రజాప్రతినిధులు ఈ దీక్షలో పాల్గొన్నారు కాబట్టి భారీగా పోలీసుల మోహరింపు కూడా జరిగిందక్కడ. మేమూ మీకు మద్దతునిస్తున్నామని హైద్రాబాద్ నుంచి చెప్పటం కోసం చేసిన మూడు గంటల దీక్షలో ఫొటో సెషన్స్, వీడియో కవరేజ్ లు మీడియాతో మాట్లాడటంతో సరిపోయింది.

ఒకప్పుడు తెలంగాణా కాంగ్రెస్ నాయకులు కూడా ఇదే పరిస్థితిలో ఉండేవారు. వారి వారి సొంత నియోజక వర్గానికి పోతే రాజీనామాలు చెయ్యమని నిలదీసేవారు, చెయ్యకపోతే తెలంగాణా ద్రోహి అని ముద్ర వేసేవారు. ఇప్పుడు సీమాంధ్ర కాంగ్రెస్ నాయకుల పరిస్థితి కూడా అలాగే తయారైంది. ఇటు ఆందోళన చేస్తున్న ఉద్యమకారులకూ ఏమీ చెప్పలేరు, పార్టీ పెద్దలకీ ఏమీ చెప్పలేరు. పార్టీ తరఫునుంచి ప్రజలకూ ఎటువంటి హామీలివ్వలేరు, ఆందోళనను నియంత్రిస్తామని అధిష్టానానికీ మాటివ్వలేరు. రాజకీయాలనే నమ్ముకుని ఉండటం వలన పదవులనూ వదులుకోలేరు, అధికార వర్గంలో ఉన్నా ఏమీ తాముగా చెయ్యలేరు. ఏదో చేస్తున్నట్టుగా ఉండాలి, కానీ అధిష్టానాన్ని ధిక్కరించిన సంకేతాలూ పోగూడదు. చాలా ఇరకాటమైన పరిస్థితి.

అదే చోట ఇంకా ఎక్కువ దీక్ష చేసి పార్టీ ఆగ్రహానికీ గురవలేరు, ఏమీ చెయ్యకుండా మౌనంగా ఉండిపోయి జనాగ్రహానికీ గురికాలేరు. చేతిలో అధికారం లేదు అని చెప్తే, మరి మిమ్మల్ని గెలిపించింది ఎందుకు అని ప్రజలు నిలదీసి అడుగుతారు, పోనీ ప్రజలే ఎన్నుకున్నారు కాబట్టి వారి పక్షాన పోరాడదామా అంటే ఉన్న అధికారాలు కూడా ఊడతాయేమోననే భయం. తెలంగాణా కాంగ్రెస్ నాయకులను అంతకు ముందు చూసారు కానీ ఆ పరిస్థితి తమకూ వస్తుందని ఊహించని నాయకులు పాపం చాలా ఇరకాటంలో పడ్డారు.

అయినా నిరాశపడకుండా, చిరునవ్వు చెరగకుండా, లోపలి భయాలు బయటకు కనపడకుండా జాగ్రత్తగా మేనేజ్ చేసుకుంటూ నడుచుకుంటున్న సీమాంధ్ర నాయకులు ప్రజల ఆందోళనను అర్థం చేసుకుని వారికి మద్దతుగా దీక్ష చేస్తామని అన్నారు, అన్న మాట ప్రకారం మూడుగంటల దీక్ష చేసారు.

-శ్రీజ