ముస్తాబౌతున్న ఖైరతాబాద్ వినాయకుడు

Posted: 08/18/2013 11:31 AM IST

సెప్టెంబర్ 9 న జరగబోతున్న వినాయక చవితికి హైద్రాబాద్ లోని ప్రసిద్ధ ఖైరతా బాద్ గణేశుడు ముస్తాబవుతున్నాడు.  59 అడుగుల ఎత్తులో రూపు దిద్దుకుంటున్న గణేశ విగ్రహంలో ఈ సారి కూడా గణపయ్య కొత్త రూపంలో అవతరించబోతున్నాడు.  చతుర్ముఖుడిగా మూషిక వాహనంతో పాటు గోవులతోకూడా కూడి భక్తులకు వరాలందించబోతున్నాడు.  

నగరంలోను, రాష్ట్రంలో ఇతర ప్రాంతాల్లోను వినాయక చవితికి సన్నాహాలు చురుగ్గా సాగుతున్నాయి.  వినాయక చవితి వస్తుందంటేనే పిల్లలు యువకులలో ఉత్సాహం మొదలౌతుంది.  దానికి తోడు ఈ పండుగ మరో రెండు పెద్ద పండుగలకు నాంది పలుకుతుంది.  అవి దసరా దీపావళి పండుగలు.  

విఘ్న నాయకుడిగా అన్ని పూజలలోనూ అగ్రతాంబూలమందుకునే వినాయకుడిని భక్తి శ్రద్ధలతో పూజించే హిందువులు తాము తలపెట్టిన పనులకు విఘ్నం కలుగకుండా చూసుకుంటాడని ప్రగాఢంగా నమ్ముతారు.  తొమ్మిది రోజుల ఉత్సవాలను అన్ని ప్రాంతాలలోను, ఇళ్ళల్లోనూ శక్త్యానుసారం జరుపుకుని చివరి రోజున విగ్రహ నిమజ్జనం కావిస్తారు.  

ఖైరతాబాద్ గణేశుడిని నవరాత్రులలో కనీసం ఒకసారైనా దర్శించుకుని ఆయన అనుగ్రహం పొందటం కోసం హైద్రాబాద్ లోని నలుమూలలనుంచే కాకుండా చుట్టుపక్కల జిల్లాల నుంచి కూడా భక్తులు తండోపతండాలుగా వస్తారు.  

-శ్రీజ