నా లైఫ్ నా ఇష్టం

Posted: 08/03/2013 03:19 PM IST

నా ప్రైవేట్ లైఫ్ లోకి వచ్చే అధికారం మీకెక్కడుంది. చొరబాటుతనం మీడియాకు మంచిది కాదు. నేను నా విరామ సమయంలో స్పెయిన్ లోని ఇబిజా బీచ్ లో తిరుగుతుంటే నాకు తెలియకుండా నా అనుమతి లేకుండా ఫొటోలు తీసి ప్రచురించటం నాకు చాలా బాధని కలిగిస్తోంది – ఇవీ కత్రినా కైఫ్ మీడియాకు లిఖితపూర్వకంగా తెలియజేసిన విషయాలు.

మనందరికీ మన సొంత జీవితాలున్నట్లే సెలబ్రిటీస్ కి కూడా ఉంటాయి. పరదా మీద మనలను అలరించిన పాపాన వాళ్ళకంటూ ఒక జీవితం ఉండగూడదా. మనలను మనం ఆత్మ విమర్శ చేసుకుని వాళ్ళ స్థానంలో ఊహించుకుంటే మన మనసులూ బరువెక్కుతాయి. కాకపోతే వాళ్ళ కథలే పసందుగా వినబుద్ధవుతాయి కాబట్టి సినిమా నటీనటులు, క్రీడాకారులు, ఇంకా దొరికితే రాజకీయ నాయకుల జీవితాలలోని వాళ్ళ వ్యక్తిగత జీవితాల గురించి భోగట్టా తీసుకుని రాస్తుంటారు.

కత్రినా కైఫ్ రణబీర్ కపూర్ తో స్పెయిన్ లో సరదాగా తిరిగివచ్చిన కథనంతో పాటు సాక్ష్యాధారాలుగా వాళ్ళ ఫొటోలను కూడా ఒక సినిమా పత్రిక ప్రచురిస్తే మిగతా మీడియాలు కూడా వాటిని వాడుకున్నాయి. కొందరు పత్రికలవాళ్ళు కేవలం సినిమావాళ్ళ నిజజీవితంలోకి అనుమతిలేకుండా ప్రవేశిస్తూ, పిరికిపందలలాగా వ్యవహరిస్తూ దొంగతనంగా వాళ్ళ ఫొటోలను తీస్తుంటారంటూ కత్రినా ఆవేదనను వ్యక్తపరచింది.

అయినా నాకు, మీడియాకు మధ్య ఎంతో సన్నిహిత సంబంధముందంటూ కూడా కత్రినా చెప్తోంది. అలాంటప్పడు నేను చెప్పేవి వేసుకోవాలి కానీ నాకు తెలియకుండా నా ఫొటోలను వాడటాన్ని నేను సహించనంటూ కత్రినా మీడియాకు చురకవేసింది.

అయితే ఇదీ ప్రచారంకోసమే కత్రినా చేస్తున్నపనేనంటూ కొందరు చెవులు కొరుక్కుంటున్నారు. కత్రినా రణబీర్ కపూర్ ల కథనం పాతబడుతోంది. మళ్ళీ ఈ విధంగా దాన్ని తాజాగా చేస్తున్నదని వాళ్ళు అభిప్రాయపడుతున్నారు.

http://www.morningcable.com/home/arts-n-antertainment/33311-sensational-picture-threatens-katrinas-love-life.html

-శ్రీజ