మూడురోజుల్లో తెలంగాణ

Posted: 08/03/2013 12:05 PM IST

మూడురోజుల్లో తెలంగాణా రాష్ట్రాన్నివ్వచ్చని, పార్లమెంట్ లో బిల్ పాస్ చేసి రాష్ట్రపతికి పంపితే మరో మూడు రోజుల్లో పని పూర్తైపోతుందని, ఇంత హఠాత్తుగా నిర్ణయం తీసుకున్న కాంగ్రెస్ పార్టీ రాజకీయ ప్రయోజనం కోసమే రాష్ట్ర విభజనను ప్రకటించిందనే అపవాదు మోయకుండా ఉండాలంటే మొదలుపెట్టిన పనిని పూర్తిచేసి చూపించాలని భారతీయ జనతాపార్టీ అధికార ప్రతినిధి ప్రకాశ్ జావ్దేకర్ సూచించారు.

శుక్రవారం హైదరాబాద్ లో మీడియా సమావేశంలో మాట్లాడిన జావ్దేకర్ కేవలం రాజకీయ లబ్ధి కోసమే, తెలంగాణా సమస్య కారణంగా కాంగ్రెస్ పార్టీ రాష్ట్రంలో పూర్తిగా తుడిచిపెట్టుకుని పోతుందనే భయంతోనే ప్రత్యేక తెలంగాణా రాష్ట్రానికి సై అన్నారని అన్నారు. 

అయితే తెలంగాణా సమస్యను పరిష్కరించటంలో కాంగ్రెస్ తీసుకున్న తికమక చర్యలు సీమాంధ్రలో గందరగోళాన్ని సృష్టిస్తున్నాయని జావ్దేకర్ అన్నారు.  అందులోనూ రాష్ట్ర వేర్పాటుకు పట్టే సమయాన్ని కాంగ్రెస్ నేతలు రకరకాలుగా చెప్తూ ప్రజలను ఇంకా అయోమయ స్థితిలోకి నెట్టివేస్తున్నారని అన్నారాయన.  మొదట్లో దిగ్విజయ్ సింగ్ నాలుగు నెలలు పడుతుందంటే గులామ్ నబీ ఆజాద్ ఐదు నెలలని, సుశీల్ కుమార్ షిండే ఆరునెలలని చెప్తున్నారని చెప్తూ, ఆ మధ్య నెలంటే 30 రోజులు కాదన్న ఆజాద్ మాటలను కూడా ఆయన గుర్తుచేసారు. 

భాజపా అధికారంలోకి వచ్చిందంటే 100 రోజుల్లో తెలంగాణా ఇస్తుందని చేసిన వాగ్దానం వలన భయపడ్డ కాంగ్రెస్ పార్టీ ఆ విధంగా పావులను చకచకా కదుపుతూ తెలంగాణా ప్రకటన చేసిందని, అయితే దాన్ని పూర్తి చెయ్యాల్సిన బాధ్యత కాంగ్రెస్ దేనని, ఆ పని పూర్తి చేస్తేనే కాంగ్రెస్ కి తెలంగాణా ప్రజల సద్భావన లభిస్తుందని ప్రకాశ్ జావ్దేకర్ అన్నారు.

-శ్రీజ