స్వర్ణకమలం సిల్వర్ జుబ్లీ

Posted: 07/15/2013 12:36 PM IST

కె.విశ్వనాధ్ దర్శకత్వంలో రూపొందిన అపూర్వ కళాఖండాల్లో వెంకటేష్, భానుప్రియ జంటగా నటించిన చిత్రం స్వర్ణకమలం ఒకటి.

ఈరోజుకి స్వర్ణకమలం విడుదలై సరిగ్గా 25 సంవత్సరాలు!

కళలమీద సాగే ఇతివృత్తంతో మధ్యతరగతి కుటుంబాల వాతావరణంలో చిత్రించి ఆధునిక యువతకు కూడా సంగీతం నృత్యంలాంటి పురాతనమైన కళల మీద దృష్టి పడటమే కాకుండా ఆసక్తి కూడా పెరిగే విధంగా తీర్చిదిద్దిన ఘనత కె.విశ్వనాధ్ కే దక్కుతుంది.

శంకరాభరణంలో సంగీతానికి, సాగరసంగమంలో నృత్యానికి ప్రాధాన్యతనిచ్చినట్లే, స్వర్ణకమలంలో కూడా నృత్యానికి ప్రాధాన్యతనిస్తూ సాగే కథనంలో భానుప్రియ అత్యంత అద్భుతమైన నటనను ప్రదర్శించింది.  పొరుగింటిలో ఉంటూ ఆపదల్లో ఆదుకునే మంచి మనిషి పాత్రలో వెంకటేష్ నటన అలరించింది.

ఇంట్లోనే నృత్యంలో ప్రావీణ్యుడైన తండ్రి ఉండగా, తన కళనంతా ధారపోసి కూతురుని గొప్ప కళాకారిణిగా చూద్దామనుకున్న అతని ఆశలమీద నీళ్ళు చల్లి చివరకు తండ్రి చనిపోయిన తర్వాత, విదేశీయులు పొగిడిన తర్వాతనే సత్యాన్ని గ్రహించి, భారతీయ కళల గొప్పతనాన్ని గుర్తించి చివరకు తండ్రి ఆశలమేరకు కళాకారిణిగా పేరుగాంచిన పాత్రలో భానుప్రియ ఒదిగిపోయి నటించింది. 

స్వర్ణకమలం భాను ఆర్ట్స్ పతాకం మీద సిహెచ్ వి అప్పారావు నిర్మించారు, అద్భుతమైన సంగీతాన్ని ఇళయరాజా అందించారు. 

స్వర్ణకమలం గొప్పతనం గురించి జ్ఞాపకం చేసుకోవటం కాదు, మరో సారి చూడదగ్గ సినిమా అది.  అయితే ప్రస్తుతం నడుస్తున్న ఖరీదైన వాతావరణం, నాయికా నాయకులు ఊహల్లో విదేశాల్లోకి పోయి నృత్యాలు చేసి రావటం, వేడకొడవళ్ళు. తుపాకీలతో పోరాటాలు, సుమోలు గాల్లోకి పల్టీలు కొట్టటం లాంటి దృశ్యాలే కావాలని అనుకునేవారికి సినిమా మొత్తంలో ఏదో ఒకచోట ఐటమ్ సాంగ్ కోసం ఎదురుచూసేవారికి అందులో ఏ ఒక్కటీ ఈ సినిమాలో ఉండదు కానీ ఏ లోపమూ కనిపించదని హామీ ఇస్తున్నాం. 

25 సంవత్సరాలు నిండిన సందర్భంగా స్వర్ణకమలం చిత్ర యూనిట్ కి కళాకారులందరికీ అభినందనలు.

-శ్రీజ