తిరుపతి రాయుడుకు నిరాశే?

Posted: 07/15/2013 11:16 AM IST

మన తెలుగు రాయుడులో ప్రతిభ పుష్కలం ఉన్న సరే.. చోటు దక్కించుకోవటంలో మాత్రం వెనబడిపోతున్నాడు. తెలుగుతేజం అంబటి తిరుపతి రాయుడిలో ప్రతిభకు కొదవలేదు. కావాల్సిన అర్హతలు పుష్కలంగా ఉన్నాయి. కానీ అతని అరంగేట్రం అందని ద్రాక్షలాగే ఉండిపోతోంది. ఆలస్యంగానైనా భారత జట్టులోకొచ్చిన రాయుడుకు మళ్లీ నిరాశ ఎదురైంది. గతేడాది ఇంగ్లండ్‌తో టి-20 సిరీస్‌తో పాటు తాజా వెస్టిండీస్ ముక్కోణపు సిరీస్‌కు చోటు దక్కినా రిజర్వ్ బెంచ్‌కే పరిమితమయ్యాడు. సురేష్ రైనా, దినేశ్ కార్తీక్, శిఖర్ ధవన్, ఇర్ఫాన్ పఠాన్, రాబిన్ ఊతప్ప, ఆర్పీ సింగ్.. ఈ టీమిండియా క్రికెటర్లందరూ అండర్-19 స్థాయిలో రాయుడు కెప్టెన్సీలో ఆడినవారే. చిత్రమేంటంటే రాయుడు మినహా మిగిలిన వారందరూ ఎప్పుడో అంతర్జాతీయ క్రికెట్లో అరంగేట్రం చేసేశారు. రైనా, కార్తీక్, ధవన్, ఇర్ఫాన్.. తాజా వెస్టిండీస్ సిరీస్‌లో భారత జట్టులో సభ్యులు కూడా. జాతీయ జట్టులో గత రెండు సార్లూ అతనికి అనూహ్యంగానే చోటు దక్కింది.

 మనోజ్ తివారి గాయపడటంతో ఇంగ్లండ్‌తో సిరీస్‌కు.. ధోనీ గాయపడటంతో వెస్టిండీస్ ముక్కోణపు సిరీస్‌కు ఎంపికయ్యాడు. పోటీ తీవ్రంగా ఉండటంతో రిజర్వ్ బెంచ్‌కే పరిమితమయ్యాడు. విరాట్ సారథ్యంలో జింబాబ్వే పర్యటనకు వెళ్లే భారత జట్టుకు మాత్రం నేరుగా ఎంపికయ్యాడు. 2010 సీజన్లో ఐపీఎల్‌లో ముంబయి తరపున ఆడే అవకాశం రావడం అతని కెరీర్లో కీలక మలుపు. బ్యాటింగ్ దిగ్గజం సచిన్ సహచర్యంతో మరింత రాటుదేలాడు. ముంబయి తరపున కీలక ఇన్నింగ్స్‌లు ఆడిన రాయుడుకు ఐపీఎల్ మంచి గుర్తింపు తెచ్చిపెట్టింది. ఇక 2010-11 సీజన్ నుంచి రంజీల్లో బరోడాకు ప్రాతినిధ్యం వహిస్తున్నాడు. 80 ఫస్ట్ క్లాస్ మ్యాచ్‌లాడిన రాయుడు 5183 పరుగులు చేశాడు. గత రంజీ సీజన్లో 60.54 సగటుతో 666 పరుగులు చేశాడు. దీంతో రాయుడు మరోసారి టీమిండియా సెలెక్టర్ల దృష్టిని ఆకర్షించలిగాడు. వచ్చే జింబాబ్వే పర్యటనలోనైనా అవకాశం లభిస్తుందో లేదో చూడాలి.