ఆ 'టీ' వద్దంటున్న ఎమ్మెల్యే కిషన్‌రెడ్డి

Posted: 06/27/2013 11:05 AM IST

రాష్ట్రంలో తెలంగాణ ప్యాకేజీ వలన టిఆర్ఎస్ నాయకులు, కమలం నాయకులకు నిద్రలేకుండా చేస్తుంది. కొంతమంది రాయల్ తెలంగాణ అంటున్నారు. ఏది నిజమో, ఏది అబద్దమో తెలియాదు గానీ మొత్తం మీద ఫ్యాకేజీ-రాయల తెలంగాణ రెండు ప్రకటనలు తెరమీదకు రావటంతో రెండు పార్టీల నాయకులు ఆందోళన చెందుతున్నారు. రాయల తెలంగాణ పై బిజేపి రాష్ట్ర అధ్యక్షుడు జి.కిషన్‌రెడ్డి తీవ్రంగా ఖండించారు. తెలంగాణ రాష్ట్ర ఏర్పాటు విషయంలో కొత్త మెలికలనుపెట్టి ఉద్యమాన్ని నీరుగార్చేందుకు ప్రయత్నిస్తున్న కాంగ్రెస్‌కు అంతిమ ఘడియలు దగ్గర పడ్డాయని జి.కిషన్‌రెడ్డి స్పష్టం చేశారు. రాజధాని శివార్లలో రెండ్రోజులపాటు చింతన్‌బైఠక్‌ను నిర్వహించిన అనంతరం పార్టీ సహచరులు ప్రకాష్‌రెడ్డి, ఎస్‌.కుమార్‌, మహిళా మోర్చా రాష్ట్ర అధ్యక్షురాలు మాలతీరాణితో కలిసి పార్టీ రాష్ట్ర కార్యాలయంలో మాట్లాడారు. కేంద్రంలోని యూపీయే ప్రభుత్వం తాజాగా వెలుగులోకి తెస్తున్న రాయల తెలంగాణకు తమ పార్టీ అంగీకరించదన్నారు. హైదరాబాద్‌ రాజధానిగా 10 జిల్లాలతో కూడిన తెలంగాణ రాష్ట్ర ఏర్పాటుతో పాటు కోస్తా, రాయలసీమ ప్రాంతాల అభివృద్ధికి కేంద్రం ప్రత్యేక ప్యాకేజీని ప్రకటించాలని ఆయన డిమాండ్‌ చేశారు. చింతన్‌బైఠక్‌లో పాల్గొన్న సభ్యులు మూకుమ్మడిగా ఇదే అభిప్రాయాలను వెల్లడించినట్లు తెలిపారు. ప్రజలు సమర్థ నాయకత్వం కోసం ఎదురుచూస్తున్నారని, కాం గ్రెసును గద్దె దించి అధికారాన్ని కైవసం చేసుకోగల శక్తియుక్తులు, ప్రజల విశ్వాసం తమ పార్టీపై ఉన్న తరుణంలో ఇంటింటికీ బిజేపి కార్యక్రమాన్ని నిర్వహించడం ద్వారా యువతను, గ్రామీణులను పార్టీలోకి ఆహ్వానించాలని నిర్ణయించామన్నారు.