కెసిఆర్ ఖాతాలోకి మరో జమ

Posted: 06/09/2013 09:57 AM IST

ఈరోజు కెసిఆర్ చేవెళ్ళ సందర్శించబోతున్నారు.  అందుకు కారణం ఒకటి షాబాద్ చౌరస్తాలో ఆవిష్కరించనున్న దివంగత ఉప ముఖ్యమంత్రి కొండా వెంకట రంగారెడ్డి విగ్రహం, రెండవది చెవెళ్ళలో బహిరంగ సభ. ఆ సభలో రంగారెడ్డి మనుమడు కొండా విశ్వేశ్వరరెడ్డి తన మద్దతుదారులతో కలిసి తెలంగాణ రాష్ట్ర సమితిలో చేరబోతున్నారు. 

ఈ రోజు సాయంత్రం 3 గంటలకు జరగబోయే బహిరంగ సభకు పాలిట్ బ్యూరో సభ్యులు, శాసనసభ్యులు, పార్లమెంటు సభ్యులు హాజరయ్యే అవకాశం ఉండటం వలన ఏర్పాట్లన్నీ ఘనంగా జరుగుతున్నాయి.

ముఖ్యమైన నేతలు తెరాసలో చేరటాన్ని ఇలా బహిరంగ సభల్లో నిర్వహించటం వలన నాయకులకు, కార్యకర్తలకు ఉత్సాహం కలుగుతోంది.  కెసిఆర్ పార్టీని బలోపేతం చేయటానికి సంకల్పించిన వేళావిశేషం వలన చకచకా నాయకులు పార్టీలో చేరుతున్నారని తెరాస శ్రేణులు సంతోషాన్ని వెలిబుచ్చుతూ తెలియజేసారు.

తెరాస లో చేరబోతున్న కొండా విశ్వేశ్వరరెడ్డి తెలంగాణా ప్రోగ్రెసివ్ సంస్థకు అధ్యక్షులు.  ఆయన తాతగారైన కొండా వెంకటరెడ్డి విగ్రహాన్ని ఈ రోజు కెసిఆర్ ఆవిష్కరించబోతున్నారు.  భారతదేశ స్వాతంత్ర పోరాట యోధుడు, తెలంగాణ కోసం నిజామ్ ప్రభుత్వంతో పోరాటం సలిపినవారు.  ఆంధ్రప్రదేశ్ ఉప ముఖ్యమంత్రిగా పని చేసిన రంగారెడ్డి పేరుతోనే హైద్రాబాద్ రూరల్ రంగారెడ్డి జిల్లాగా విలసిల్లింది.

-శ్రీజ