కిరణ్ కుమార్ కి సన్మానం

Posted: 05/04/2013 09:23 AM IST

Kiran kumar will be felicitated for removal of vat on textiles

చాలాకాలంగా వస్త్రవ్యాపారులు చేస్తున్న ఆందోళన ఫలించి వారిమీద వ్యాట్ ను రద్దుచెయ్యటం జరిగింది. అందుకు కృషి చేసిన ముఖ్యమంత్రి కిరణ్ కుమార్ రెడ్డి కి కృతజ్ఞతలు తెలుపుకుంటూ, ఆయనకు ఈరోజు వస్త్ర వ్యాపారులు సన్మానం చెయ్యటానికి నిర్ణయించుకున్నారు.

ఈ కార్యక్రమం సాయంత్రం 4 గంటలకు ఎల్ బి స్టేడియం లో జరుగుతుందని వస్త్రవ్యాపార ప్రతినిధులు తెలియజేసారు.

ఎంతోకాలంగా వ్యాట్ ని రద్దు చేయమని వ్యాపారులు ప్రభుత్వాన్ని కోరుతూ వచ్చారు. ఎన్నోసార్లు నిరసనగా దుకాణాలు మూసివేసారు. కమ్యూనిస్ట్ పార్టీలు కూడా వారికి మద్దతు పలికాయి. సామాన్యుడి మీద భారం పడుతుందంటూ ఆందోళన చేసారు. ప్రభుత్వంతో చర్చలు జరిపారు. చిట్టచివరకు వస్త్రవ్యాపారులు బంద్ ను పాటిస్తామని చెప్పగా ఆర్థిక మంత్రి ఆనం రామనారాయణ రెడ్డి నేతృత్వంలో జరిగిన సమావేశంలో చర్చలు ఫలించి వ్యాట్ ను పూర్తిగా రద్దు చేయవలసిందిగా ముఖ్యమంత్రికి సిఫారసు చేసారు. దానితో ముక్యమంత్రి పోయిన నెల 28న ప్రభుత్వం వ్యాట్ రద్దు చేస్తున్నదంటూ ప్రకటించారు. అయితే దీనివలన వ్యాట్ రూపంలో 9000 కోట్ల రూపాయల బాకీలు ప్రభుత్వానికి రాకుండా పోతున్నాయి.

అయినా ముఖ్యమంత్రి సామాన్యుడి మీది భారాన్నిదృష్టిలో పెట్టుకుని, వస్త్రవ్యాపారులు వ్యాపారాలను చేసుకునే విధంగా వెసులుబాటు కలిగిస్తూ వ్యాట్ ని తీసివేయటం వలన వస్త్రవ్యాపారులు అందుకు కృతజ్ఞతగా ఈరోజు ముఖ్యమంత్రికి సన్మాన కార్యక్రమాన్ని నిర్వహిస్తున్నారు.

-శ్రీజ