దాడి వీరభద్రరావు వైకాపాలో చేరిక

Posted: 05/03/2013 02:38 PM IST

Political dadi meeting jagan at jail before joining yscp

అందరికీ వచ్చిన అనుమానం నిజమే అయింది. తెలుగు దేశం పార్టీ నుంచి రాజీనామా చేసిన సీనియర్ నేత దాడి వీరభద్రరావు తాను వైయస్ ఆర్ కాంగ్రెస్ పార్టీలో చేరుతున్నానని ప్రకటించారు. 30 సంవత్సరాలుగా తెలుగుదేశం పార్టీకి సేవ చేసినా గుర్తింపు లేకపోయిందని, తనను అవమానించారని ఆయన వాపోయారు. రేపు పదిగంటలకు ఆయన వైకాపా తీర్థం కోసం చంచల్ గూడా జైలుకి వెళ్ళనున్నారు.

శాసనమండలి సభ్యత్వం నుంచి పదవీ కాలం అయిపోయిన తన స్థానంలో తనకి మరో అవకాశం ఇవ్వకుండా మరొకరిని నిలబెట్టారంటూ దాడి వీరభద్రరావు తెలుగు దేశం పార్టీ అధినేత చంద్రబాబు నాయుడు మీద అప్పుడే ఆగ్రహం చూపించారు కానీ తెదేపా కి విధేయతగా ఉంటానని కూడా అప్పట్లో మాటిచ్చారు. ఈలోపులో తన మద్దతుదారులను సంప్రదించి ఒక నిర్ణయానికి వచ్చిన దాడి పార్టీ సభ్యత్వం నుంచి రాజీనామా చెయ్యటంతో ఆయన వైకాపా లో చేరుతారనే అభిప్రాయం చాలామందిలో కలిగింది. దాన్ని నిజం చేస్తూ ఆయన అనకాపల్లిలో మీడియా ముఖంగా ప్రకటన చేసారు.

సీనియర్ నేతగా మరో పార్టీలోకి వెళ్ళి చేరటానికి ఒక మిష కావాలి కాబట్టి దాడి అలా కోపాన్ని ప్రదర్శించారని అప్పట్లోనే గుసగుసలు వినిపించాయి. కానీ తాను పార్టీకి విధేయుడిగా ఉంటానని అంటూనే ఆయన తన భావి రాజకీయ జీవితాన్ని వైయస్ జగన్ ఛత్రఛాయలో గడపటానికి వ్యూహ రచన చేసారని రాజకీయ పండితులు భావిస్తున్నారు.

తెదాపాలో పదవీ కాలం అయిపోయిన తర్వాత ఎమ్మెల్సీ టికెట్ ఇవ్వలేదు సరే కానీ అక్కడ ఏమీ లేదు సరిగదా, ముందుగానే ఆ పార్టీలో చేరిన సీనియర్ కొణతాల రామకృష్ణ, దాడి వీరభద్రరావు ఆ పార్టీలో చేరుతానని ప్రకటించక ముందునుంచే దాన్ని ఊహించి, ఆ ప్రక్రియను అడ్డుకోవాలని తన మద్దతుదారులైన కార్యకర్తలతో సమావేశమై నిర్ణయించుకున్నట్టుగా సమాచారం. వైకాపా లో చేరుతానని ప్రకటన చెయ్యటానికి ముందు దాడి వీరభద్రరావు అనకాపల్లిలో కార్యకర్తలతో జరిపిన సమావేశంలో ఆయన తెదేపాలో కొనసాగితేనే మంచిదని వారు సలహా ఇచ్చినట్టుగా కూడా సమాచారం.

-శ్రీజ