Posted: 03/07/2013 09:51 AM IST

హైద్రాబాద్ లో జరిగిన బాంబు పేలుళ్ల వలన అమాయకులైన కొందరు ముసల్మానులు అనవసరంగా నలిగిపోతున్నారంటూ ప్రెస్ కౌన్సిల్ ఛైర్మన్ మార్కండేయ కట్జూ ఆవేదనను వ్యక్తపరచారు. జాతీయ మైనారిటీ వర్గాల కమిషన్ అధ్యక్షుడు వజాహత్ హబిబుల్లా రాసిన లేఖకు స్పందిస్తూ కట్జూ మీడియాను సంయమనం పాటించమని, తమ వార్తలలో ముస్లిం వర్గాలను ప్రత్యేకంగా లక్ష్యం చేసి రాయకండని అర్థించారు. హబీబుల్లా రాసిన లేఖలో, ఒక పక్క దర్యాప్తు జరుగుతుండగానే, ఏదీ తేలకముందే మీడియా ఒక వర్గాన్ని లక్ష్యంగా వార్తలను ప్రచురిస్తోంది అని ఆరోపించారు.

ఈ సందర్భంలో, ఉగ్రవాద చర్య అనగానే దాన్ని చేసింది ముస్లిమే అనే భావన ఏర్పడింది అని బి.రామన్ రాసిన ఒక వ్యాసం ప్రస్తావన తీసుకోచ్చారు కట్జూ. అది మాత్రం సత్యం అంటూ, అటువంటి అభిప్రాయాన్ని కలుగజేసేట్టుగా ప్రచారం చెయ్యటం వలన కొందరు పోలీసు అధికారుల అనుమానం పేరుతో కొందరు ముస్లింలను అదుపులోకి తీసుకుంటున్నారు. ఒకసారి అటువంటి కేసులో లోపలికి పోతే ఆ మనిషికి బెయిల్ దొరకటం కష్టం. ఆ తర్వాత చాలా కాలం తర్వాత ఆ వ్యక్తి నిరపరాధని తేలినా, గతించిన అతని కాలాన్ని తిరిగి తేవటం మాత్రం సాధ్యం కాదు. ఆ నష్టం ఎవరూ పూరించలేనిదని కట్జూ అన్నారు.

బాంబు పేలిన గంటలోపులోనే ఎవరో మేము ఫలానా ఉగ్రవాద సంస్థ వాళ్ళం, ఆ ఘనకార్యం మాదే అని చెప్తే వెంటనే మీడియా దాన్ని తమ మాధ్యమం ద్వారా ప్రచారం చేస్తుంది. ఎంత తప్పిదమది. ఎవరో బాధ్యతారహితంగా, కుట్రపూరితంగా పంపిన లేఖను టివి స్క్రీన్ మీద చూపించటం వలన ఉగ్రవాదులంటే ముస్లిములే, బాంబులను పెట్టి పేల్చి విధ్వంసాన్ని సృష్టిస్తున్నది వాళ్ళే అనే భావన ప్రజలందరిలోనూ ఏర్పడుతోంది.

సమాజంలోని అన్ని వర్గాలకూ సమానమైన హోదాను గౌరవాన్ని ఇచ్చినప్పుడే దేశం ఏకతాటి మీద నిలిచి ప్రగతిని సాధిస్తుందని మార్కండేయ కట్జూ సూచించారు.

-శ్రీజ