Posted: 03/07/2013 09:05 AM IST

పది సంవత్సరాల పాలనలో యుపిఏ ప్రభుత్వం ఏం చేసిందన్నది ప్రజలందరూ గమనిస్తూనే వున్నారు.  2004, 2009 ఎన్నికల్లో వోటర్లు ఏం చేసారో ఇప్పుడూ 2014లో కూడా అదే చేస్తారు అని ధీమాగా చెప్పారు ప్రధాన మంత్రి మన్మోహన్ సింగ్.

ఉభయసభలకూ ప్రారంభోపన్యాసమిచ్చిన రాష్ట్రపతికి ధన్యవాదాలు చెప్పుకుంటున్న దాని మీద లోక్ సభలో జరిగిన చర్చలో మాట్లాడుతూ, ఢిల్లీలో కేంద్ర కార్యవర్గ సమావేశమంటూ గుమికూడి కాంగ్రస్ పార్టీని నన్ను కూడా కలిపి దుమ్మెత్తిపోసిన భారతీయ జనతా పార్టీకి మేము అదే భాషలో సమాధానమివ్వగలం కానీ అది మా అభిమతం కాదు.  మేము పని చేసి చూపించేవాళ్ళం అంటూ ఘూటుగా చెప్పారు మన్మోహన్ సింగ్.  జో గర్జ్ తే హై వో బరస్తే నహీ అనే సామెతను కూడా ఉపయోగించారాయన.  ఉరిమే మేఘాలు కురవవు అని అర్థం.  తెలుగులో దానికి సమాంతరమైన సామెతుంది.  మొరిగే కుక్క కరవదు అని.  ఆరు సంవత్సరాల ఎన్ డి ఏ పాలనలోని లోపాలను సవరిస్తూ 9 సంవత్సరాలు యుపిఏ ప్రభుత్వం నిర్విరామంగా పనిచేసిందని, ఇంకా చేస్తుందని, దేశంలోని ద్రవ్య లోటుని సమర్ధవంతంగా అరికడుతుందనే ఆత్మవిశ్వాసాన్ని ప్రధాని వెలిబుచ్చారు.  ఉక్కు మనిషి అని పేరుగాంచిన అద్వానీని నా లాంటి మెతక మనిషికి పోటీగా నిలబెట్టారప్పుడు ఏమైంది.  అంటూ ఇప్పుడు నరేంద్రమోదీ నిలబడ్డా ఏమీ కాదు అన్న మాటను చెప్పకనే చెప్పారాయన. 

ఎప్పుడూ మెతక అనిపించుకునే డా.మన్మోహన్ సింగ్ అంత కచ్చితంగా ఘాటుగా మాట్లాడేటప్పటికి కాస్త వెనక్కి తగ్గిన భాజపా అధ్యక్షుడు రాజ్ నాథ్ సింగ్, మరి జమ్ము కాశ్మీర్ లోనూ తెలంగాణా విషయంలో ఘోరంగా విఫలమైందిగా అన్నారు.  అంతే కాకుండా, ఆరిపోయేముందు దీపం అలాగే ఒక్కసారి ఎక్కువగా ప్రకాశిస్తుందిలే అని వ్యాఖ్యానించారు.

-శ్రీజ