Posted: 02/09/2013 11:38 AM IST

ఆంధ్రప్రదేశ్ కి చెందిన పీసీసీ అధ్యక్షుడ్ని మార్చేయోచనలో కాంగ్రెస్ అధిష్టానం ఉందంటూ గత కొద్ది రోజులుగా వినిపిస్తున్న విషయం తెలిసిందే. ఒకవేళ మార్చితే ఎవర్ని నియమిస్తుంది ? సీమాంధ్ర ప్రాంతానికి చెందిన వ్యక్తికి ఇస్తుందా ? తెలంగాణ ప్రాంతానికి చెందిన వ్యక్తికి ఇస్తుందా ? అయితే మన రాష్ట్రానికి చెందిన బీసీ, ఎస్సీ, కాపు వర్గాలకు చెందిన నేతలు పీపీసీ పదవిని దక్కించుకునేందుకు  ప్రయత్నాలు చేస్తున్నారు. ఇక గత కొన్ని రోజుల నుండి పీసీసీ అధ్యక్షుడ్ని మార్చితే కన్నా లక్ష్మీనారాయణ రేసులో ఉన్న విషయం తెలిసిందే. కానీ ఇప్పుడు కొత్తగా తెలంగాణ ప్రాంతం నుండి డీశ్రీనివాస్ పేరు తెరపైకి రావడంతో ఉఠ్కంట నెలకొంది.  గతంలో తనకు పీసీసీ వద్దని, ముఖ్య మంత్రి పదవి ఇవ్వాలని డీఎస్‌ అభ్య ర్ధించారు. అయితే టీఆర్‌ఎ స్‌ను విలీనం చేయిస్తే సీఎం పదవి ఇస్తామని నాయ కత్వం షరతు విధించింది. మళ్లీ ఇప్పుడు కొత్తగా డీఎస్‌ పేరు తెరమీదకు వస్తోంది.

ముఖ్యమంత్రి కిరణ్‌ కూడా డీఎస్‌ అయితే తనకు ఎలాంటి అభ్యంతరం లేదని స్పష్టం చేశారు. గతంలో రెండోసారి పార్టీని అధికారంలోకి తీసుకువచ్చిన సెంటిమెంట్‌ను దృష్టిలో ఉంచుకునే సీఎం ఈ ప్రతిపాదన చేసినట్లు కనిపిస్తోంది. అటు మల్లు రవి పేరు కూడా వినిపిస్తుండగా.. విచిత్రంగా కిరణ్‌ సైతం ఆయన పేరును బలపరుస్తున్నారు. డీఎస్‌, మల్లును సీఎం బలపరుస్తున్నట్లు తెలుస్తోంది. ఇక సీనియర్‌ మంత్రి కన్నా లక్ష్మీనారాయణ పేరు మొదటి నుంచీ బలంగా వినిపిస్తోంది. పివి హయాంలోనే అవకాశం వచ్చినా వదులుకున్న ఆయన, ఆ తర్వాత అవకాశాల కోసం ఎదురుచూడవలసి వస్తోంది. కేంద్రమంత్రి చిరంజీవి, పల్లంరాజు ఆయనకు దన్నుగా ఉన్నారు. కోస్తాలో బలంగా ఉన్న కాపు, సీమలో బలిజ వర్గాల హవా ఎక్కువగా ఉన్నందున, కన్నాకు ఆ పదవి ఇవ్వడం ద్వారా ఆ పెద్ద వర్గాలనూ ఆకట్టుకోవచ్చని నాయకత్వం యోచిస్తోంది. సీమాంధ్రలో రెడ్డి-క్రైస్తవ-దళిత క్రైస్తవులు కాంగ్రెస్‌కు దూరమయి, వైకాపాకు చేరవవుతుండటంతో, వీరి కంటే సంఖ్యాబలం, ధనబలంలో ఎన్నోరె ట్లు ఎక్కువగా ఉన్న కాపులను ప్రోత్సహించడం ద్వారా రానున్న ఎన్నికల్లో వారి సాయంతో విజయం సాధించవచ్చని హైకమాండ్‌ యోచిస్తోంది. పైగా కన్నాకు కాపుల్లో మాస్‌ ఇమేజ్‌ ఉంది. మరి వీరిలో ఎవర్ని పీసీసీ పదవి వరిస్తుందో చూడాలి.