Posted: 01/28/2013 12:55 PM IST

కాంగ్రెస్ పార్టీ అధినేత సోనియా గాంధీ   క్షమాపణ చెప్పింది.   కాంగ్రెస్ పార్టీలో  ఒక నాయకుడు చేసిన తప్పుకు   సోనియా గాంధీ  క్షమాపణ చెప్పినట్లు  సమాచారం. కాంగ్రెస్‌ నేతలు ప్రవర్తించిన తీరుపై ఫిర్యాదు చేసిన సుప్రీంకోర్టు మాజీ ప్రధాన న్యాయమూర్తి జస్టిస్‌ జెఎస్‌ వర్మకు యుపిఎ ఛైర్‌పర్సన్‌, కాంగ్రెస్‌ చీఫ్‌ సోనియాగాంధీ క్షమాపణ చెప్పారు. ఈ విషయాన్ని మీడియాకు వెల్లడించిన న్యాయమూర్తి వర్మ మాట్లాడుతూ ఈ ఘటన పూర్వాపరాలను వివరించారు. ఈ నెల ఐదవ తేదీ అర్ధరాత్రి సమయంలో కాంగ్రెస్‌ పార్టీనుండి తనను కలిసేందుకు ఒక వ్యక్తి వచ్చారన్న సమాచారంతో తాను మేలుకున్నానని, అత్యాచారాలపై సూచనలు చేసేందు తన నేతృత్వంలో నియమించిన కమిటీకి కాంగ్రెస్‌ పార్టీ నుండి సూచనలు తెచ్చానని, తనను పార్టీ ప్రతినిధి జనార్ధన్‌ ద్వివేది పంపారని ఆ వ్యక్తి చెప్పాడని వివరించారు.

గత నెలలో దేశంలో సంచలనం కలిగించిన ఢిల్లీ గ్యాంగ్‌రేప్‌ ఘటన నేపథ్యంలో మహిళలపై లైంగిక హింస నిరోధానికి సూచనలు చేసేందుకు ప్రభుత్వం జస్టిస్‌ వర్మ నేతృత్వంలో కమిటీని నియమించిన విషయం తెలిసిందే. అది అర్ధరాత్రి సమయం కావటంతో ఆ సూచనలను మరుసటి రోజు కమిషన్‌ కార్యాలయానికి వచ్చి అందచేయమని చెప్పానన్నారు. ఆ మరుసటి రోజు తాను కాంగ్రెస్‌ ప్రతినిధి జనార్ధన్‌ ద్వివేదికి ఫోన్‌ చేసి ఈ అంశంపై ఆగ్రహం వ్యక్తం చేసినట్లు వర్మ వివరించారు. కొద్ది గంటల్లోనే పార్టీ అధినేత సోనియాగాంధీ తనకు ఫోన్‌ చేసి తమ పార్టీ నేత వైఖరిపై తనకు క్షమాపణ చెప్పారని వివరించారు. దిగువ స్థాయి నేత ప్రవర్తనపై పార్టీ అధినేత స్థాయిలో సోనియా క్షమాపణ చెప్పటం గొప్ప విషయమని ఆయన కొనియాడారు.