Posted: 11/07/2012 05:28 PM IST

కరీంనగర్ జిల్లా గులాబీ మయమైంది. రెండురోజుల పాటు జరగబోయే సమావేశాల్లో ఉద్యమ పంథా చాటేందుకు సర్వం సిద్ధమైంది. మేథో మదనానికి కేసిఆర్ సహా ముఖ్యనేతలు హాజరుకానున్నారు. భవిష్యత్ ఉద్యమ కార్యాచరణపై ఈ సమావేశాల్లో ప్రధానంగా చర్చ జరగనుంది.కరీంనగర్ జిల్లా కేంద్రంలోని ప్రతిమ మల్టీప్లెక్స్ లో జరగనున్న టిఆర్ఎస్ కార్యవర్గ సమావేశాలకు సర్వం సిద్ధమైంది. తొలిసారిగా హైదరాబాదేతర ప్రాంతంలో జరిగే ఈ సమావేశాలను సవాలుగా తీసుకున్న జిల్లా పార్టీ ఈ మేరకు అన్ని ఏర్పాట్లూ పూర్తి చేసింది. రోడ్లన్నీ బ్యానర్లు, కటవుట్లు, లే అవుట్లతో ఎటుచూసిన నగరం గులాబీమయమైంది. ఈ సమావేశంలో ప్రత్యేక తెలంగాణ సాధనకోసం కేంద్రంపై ఒత్తిడి తేవడానికి అనుసరించాల్సిన వ్యూహాలు, ఉద్యమాన్ని ఉదృతం చేసేందుకు తీసుకోవాల్సిన చర్యలను ప్రధానంగా చర్చించనున్నట్లు నేతలు చెబుతున్నారు. ప్రత్యేక రాష్ట్రం సాధించుకోవాలంటే మరింత దూకుడుగా ఉద్యమించాల్సిన అవసరం ఉందని నాయకత్వం భావిస్తోంది. ఈ సమావేశాలకు పార్టీ ఎమ్మెల్యేలు, పొలిట్ బ్యూరో సభ్యులు, ఇతర ముఖ్యనేతలు, మేధావులు పాల్గొననున్నారు.