Posted: 10/02/2012 12:33 PM IST

మన ప్రధాన మంత్రి మన్మోహన్ సింగ్  మాట మరిచిపోయారు, గతం ఆయనకు గుర్తుకు రావటంలేదని సీనియర్ నాయకులు ఎల్ కే అద్వానీ అంటున్నారు.  దేశంలోని రిటైల్ వ్యాపారంలోకి విదేశీ ప్రత్యక్ష పెట్టుబడులు (ఎఫ్‌డిఐ) అనుమతించాల్సిన అవసరం ఎంతమాత్రం లేదని ప్రతిపక్ష నాయకునిగా వాదించిన మన్మోహన్‌సింగ్ ఇప్పుడు గతాన్ని మరిచిపోయి తన నిర్ణయాన్ని సమర్థించుకుంటున్నారని బిజెపి సీనియర్ నేత ఎల్‌కె అద్వానీ విమర్శించారు. ఎఫ్‌డిఐలను మల్టీబ్రాండ్ రిటైల్ వ్యాపారంలో అనుమతిస్తే ఉపాధి అవకాశాలు పెరగకపోగా మరింత మంది ఉపాధి కోల్పోయి వీధుల పాలవుతారని వాదించిన మన్మోహన్ ఇప్పుడు కొత్తపాట పాడుతున్నారని తన బ్లాగులో విరుచుకుపడ్డారు. చిల్లర వ్యాపారంలో విదేశీ ప్రత్యక్ష పెట్టుబడులను అనుతించటం దేశద్రోహమే అవుతుందని లోక్‌సభలో అప్పటి కాంగ్రెస్ సభ్యుడు ప్రియరంజన్ దాస్ మున్షీ చేసిన విమర్శకు మంత్రి అరుణ్ శౌరి ‘మల్టీ బ్రాండ్ చిల్లర వ్యాపారంలో ఎఫ్‌డిఐలను అనుమతించే ప్రసక్తేలేదని’ సభలో జవాబు ఇచ్చారని అద్వానీ స్పష్టం చేశారు. ‘2002లో మన్మోహన్ సింగ్ రాజ్యసభలో ప్రతిపక్ష నాయకునిగా ఉన్నారు.

ఆ సమయంలో మహారాష్ట్ర వ్యాపార సంఘాల సమాఖ్య ప్రతినిధి వర్గం ఆయనను కలిసింది. చిల్లర వ్యాపారంలోకి విదేశీ ప్రత్యక్ష పెట్టుబడులను అనుమతించాలన్న వాజపేయి ప్రభుత్వం చేస్తున్న ప్రతిపాదనపై చర్చించారు. ఎఫ్‌డిఐలను అనుమతించవలసిన అవసరం మన దేశానికి లేదనీ, అసలు ఈ విధమైన సంస్కరణలతో పనిలేదని మన్మోహన్‌సింగ్ ఆ ప్రతినిధి వర్గానికి స్పష్టం చేశారు’ అని బిజెపి నేత తన బ్లాగులో వివరించారు. అక్కడితో ఆగకుండా రిటైల్ వ్యాపారంలో విదేశీ ప్రత్యక్ష పెట్టుబడులు వచ్చిన పక్షంలో ఉపాధిపరంగా విపరీతమైన నష్టం కలుగుతుందని కూడా మన్మోహన్ అన్నారని అద్వానీ గుర్తుచేశారు. మన్మోహన్ అభిప్రాయాలను వ్యాపార సంఘాల సమాఖ్య ప్రతినిధి వర్గం అధ్యక్షుడు సిటి షాంగ్వే ఒక లేఖలో వెల్లడించిన విషయాన్ని గుర్తుచేశారు. ఈ వ్యాపారంలో విదేశీ పెట్టుబడులను అనుమతించిన దేశాల్లోని చిన్నాచితక వ్యాపారులను బహుళ జాతి సంస్థలు అన్ని విధాలా దెబ్బతీసిన విషయాన్ని కూడా తాము మన్మోహన్ దృష్టికి తెచ్చామని షాంగ్వే పేర్కొన్నారు. కాగా సూరజ్‌కుండ్‌లో జరిగిన పార్టీ జాతీయ కార్యవర్గ సమావేశంలో ప్రతిపాదించిన ఆర్థిక తీర్మానంపై జరిగిన చర్చలో ప్రస్తావనకు వచ్చిన ఈ లేఖలోని అంశాలు ప్రధాని మన్మోహన్ సింగ్ అనుసరిస్తున్న ద్వంద్వనీతికి నిదర్శనమని అద్వానీ ఘాటుగా విమర్శించారు.