Posted: 05/31/2012 11:12 AM IST

ఆ పార్టీ పేరు చెప్పేందుకు తనకే నోరు తిరగడం లేదని, ఇక వారేమి చెప్పగలరని ఆయన నవ్వుతూ అన్నారు. ‘ఛ..అధికారం కోసం ఇటువంటి రాజకీయాలు చేస్తారని, ఇంత దిగజారుతారని అనుకోలేదు’ అని ప్రదేశ్ కాంగ్రెస్ కమిటీ అధ్యక్షుడు బొత్స సత్యనారాయణ వైఎస్సార్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మపై మండిపడ్డారు. రైతుల కోసం ఎమ్మెల్యేలు రాజీనామా చేశారని ఇంతకాలం చెప్పారనీ, ఇప్పుడేమో జగన్ కోసం రాజీనామా చేశారని విజయమ్మ ఎన్నికల ప్రచారంలో పేర్కొనడం ఆశ్చర్యం కలిగించిందని బొత్స గాంధీభవన్‌లో విలేఖరుల సమావేశంలో అన్నారు. తాము మీ హృదయాన్ని, అనురాగాన్ని చూశామని, ఇప్పుడు పుత్రవాత్సల్యం కోసం ఇలా మారుతారని అనుకోలేదని ఆయన విజయమ్మనుద్దేశించి అన్నారు. హెలికాప్టర్ ప్రమాదంలో వైఎస్ రాజశేఖరరెడ్డి మరణిస్తే దానినీ రాజకీయం చేస్తున్నారని ఆయన విమర్శించారు. అరుణాచల్ ప్రదేశ్ ముఖ్యమంత్రి, లోక్‌సభ మాజీ స్పీకర్ బాలయోగి, కేంద్ర మంత్రి మాధవరావు సింధియా హెలికాప్టర్ ప్రమాదంలో మరణించారన్న విషయాన్ని మరిచిపోరాదని ఆయన సూచించారు. అధికారం కోసం ఇటువంటి ఆరోపణలు చేస్తారని అనుకోలేదని ఆయన అన్నారు. ఇలా మాట్లాడితే సానుభూతి రాదని, ప్రజలకు ఏహ్య భావం కలుగుతుందని ఆయన తెలిపారు. వైఎస్సార్ కాంగ్రెస్ పార్టీ నాయకులు ఆ పార్టీ పేరును ‘యువజన, శ్రామిక, రైతు’గా కూడా చెప్పుకోలేరని ఆయన విమర్శించారు.