Posted: 05/11/2012 05:45 PM IST

అనంతపురం జిల్లా డీ హీరేహాళ్ మండలం గొడిశలపల్లిలో ఉప ఎన్నికల ప్రచారం చేస్తున్న జగన్‌ను చూసేందుకు వచ్చిన ఒక యువకుణ్ని గొడ్డును బాదినట్లు బాదారు. అయితే జగన్ మాత్రం అసలు విషయాన్ని దాచిపెట్టి పోలీసుల పైకి నెపం నెట్టడంతో.. ప్రజలు ఆగ్రహం వ్యక్తం చేశారు. వైఎస్ జగన్ వెంట ఉండే ప్రైవేటు గూండాలు వీరంగం సృష్టించారు. జగన్ పర్యటన సందర్భంగా జనబలం చూపాలనే ఉద్దేశంతో ఆ పార్టీ నాయకులు కొందరిని కిరాయికి తరలించారు. ఒక యువకుడు జగన్ కాన్వాయ్ వైపు వెళ్తుండగా.. ఆయన వ్యక్తిగత గూండాలు అడ్డుకున్నారు.

దీంతో ఆ యువకుడికి, వారికి మధ్య వాగ్వాదం జరిగి.. అది పెరిగి, వారు ఆ యువకుణ్ణి చితక బాదారు. జగన్ పర్యటనలో ఏఆర్ పోలీసులు కూడా ఉన్నారు. కొట్టింది వారే అనుకుని స్థానికుల్లో కొందరు పోలీసులపై దాడి చేశారు. తమను ఎందుకు కొడుతున్నారో ఆ కానిస్టేబుళ్లకు అర్థం కాలేదు. చివరికి విషయం తెలుసుకుని ఆ యువకుణ్ణి కొట్టింది తాము కాదని, జగన్ వ్యక్తిగత బాడీగార్డులని చెప్పినా వారు వినిపించుకోలేదు. పోలీసు వాహనాలకు, జగన్ కాన్వాయ్‌కి అడ్డం నిలిచారు. దీంతో పరిస్థితి ఉద్రిక్తంగా మారింది. ఇదే సమయంలో జగన్ మాట్లాడుతూ 'ఇది పోలీసుల పని.. వారి తరఫున నేను క్షమాపణ చెబుతున్నాను' అని ప్రకటించడంతో విస్తుపోవడం పోలీసుల పనయింది. జగన్‌కు బందోబస్తుగా ఉంటూ నానా అవస్థలూ పడుతోంటే తమ మీదే నిందలు మోపడమేంటని పలువురు పోలీసులు బహిరంగంగా జగన్‌ను ప్రశ్నించారు. చివరికి జగన్ ప్రచార రథం ఆ ఊరి నుంచి బయటికి వెళ్లిపోయింది. కానీ, ఆయన కాన్వాయ్‌లో ఇతర వాహనాలను ప్రజలు వెళ్లనివ్వకుండా గ్రామం చివర్లో ఎడ్లబండిని అడ్డంగా పెట్టారు. పోలీసులు వచ్చి గ్రామస్తులను బతిమాలి జగన్ కాన్వాయ్‌ని పంపించారు