షింజో అబే మృతికి భారత్ సంతాపం.. జాతీయ పతకం అవతనం..

Posted: 07/09/2022 04:33 PM IST

National flag at half mast as india mourns assassination of japan s shinzo abe

జపాన్ మాజీ ప్రధాని షింజో అబేని హత్య చేయడం ప్రపంచాన్ని కలవరానికి గురిచేసింది. జపాన్ నారా పట్టణంలో మాట్లాడుతున్న సమయంలో ఓ దుండగుడు రెండు రౌండ్ల పాటు షింజో అబేపైకి కాల్పులు జరిపారు. దీంతో షింజో అబే మరణించారు. జపాన్ మాజీ ప్రధాని షింజో అబే మరణంపై భారత్ తీవ్ర దిగ్భ్రాంతిని వ్యక్తం చేసింది. అంతేకాదు ఇవాళ ఆయన మరణానికి నివాళిని గటిస్తూ జాతీయ సంతాప దినంగా ప్రకటించింది. జ‌పాన్ మాజీ ప్రధాని షింజో అబే మృతికి నివాళిగా శ‌నివారం దేశవ్యాప్తంగా జాతీయ ప‌తాకాన్ని అవ‌న‌తం చేశారు.

ఢిల్లీలోని ఎర్రకోట‌, రాష్ట్రప‌తి భ‌వ‌న్‌, పార్లమెంట్ భ‌వ‌నాల‌పై జాతీయ జెండాల‌ను సగం వ‌ర‌కు కింద‌కు దించారు. అబే మృతికి నివాళిగా భార‌త్‌లో శ‌నివారం రోజు సంతాపం దినం పాటించ‌నున్నట్లు శుక్రవారం ట్విటర్‌ వేదికగా మోదీ ప్రక‌టించిన సంగ‌తి తెలిసిందే. అబే మృతి ప‌ట్ల ప్రధాని మోదీ తీవ్ర విచారం వ్యక్తం చేశారు. ప్రియ మిత్రుడిని కోల్పోయానంటూ సంతాపం తెలిపారు. జపాన్‌ కోసం అబే తన జీవితాన్నే అంకితం చేశారని కొనియాడారు. 2021లో కేంద్ర ప్రభుత్వం అబెకు భారత రెండో అత్యున్నత పురస్కారం పద్మ విభూషణ్‌తో సత్కరించింది.

జపాన్‌లో ఎక్కువ కాలం పనిచేసిన ప్రధాన మంత్రి అబే, ఆరోగ్య కారణాలను పేర్కొంటూ 2020లో ప్రధాని పదవికి రాజీనామా చేశారు. భారత్‌లో ముంబై-అహ్మదాబాద్‌ మధ్య తొలి బుల్లెట్‌ రైలు రావటంలో షింజో అబే కీలక పాత్ర పోషించారు. జపాన్‌ సాంకేతికతతో ఈ ప్రాజెక్టును నిర్మిస్తున్నారు. ఈ ప్రాజెక్టుకు అహ్మదాబాద్‌లో ప్రధాని మోదీ, అబె కలిసే శంకుస్థాపన చేశారు. ‘మై ఫ్రెండ్, అబే సాన్’ అనే శీర్షికతో ఒక బ్లాగ్ పోస్ట్‌లో ప్రధాని మోడీ ఇలా రాశారు. “అబే మరణంతో, జపాన్, ప్రపంచం ఒక గొప్ప దూరదృష్టిని కోల్పోయింది. నేను ఒక ప్రియమైన స్నేహితుడిని కోల్పోయాను” అని రాసుకొచ్చారు.