'కాల్​ రికార్డింగ్'​ ఇక అసాధ్యం! చర్యలకు ఉపక్రమించిన గూగుల్.!

Posted: 04/21/2022 08:58 PM IST

గూగుల్​ సంచలన నిర్ణయం తీసుకుంది. ఆండ్రాయిడ్ ఫోన్స్​లో థర్డ్​ పార్టీ కాల్ రికార్డింగ్​ యాప్స్ అన్నింటికీ సపోర్ట్ నిలిపివేసేందుకు సిద్ధమైంది. దీంతో వాయిస్ కాల్​సంభాషణలను రికార్డు చేయడం కష్టసాధ్యంగా మారుతోంది. అవతలి వ్యక్తి వాయిస్ కాల్ మాట్లాడుతున్నప్పుడు, ఆన్​లైన్​ కాన్ఫరెన్స్​లో పాల్గొంటున్నప్పుడు ఆ సంభాషణను రికార్డ్ చేయడం ఇక కుదరదు. ఈ నిబంధనలను వచ్చే నెల అనగా, మే 11 నుంచి అమల్లోకి తీసుకువచ్చే అవకాశముంది. మెజార్టీ స్మార్ట్ ఫోన్లలో ఉండే ఆండ్రాయిడ్ ఓఎస్​ను తయారు చేసే గూగుల్​ సంస్థ.. కాల్ రికార్డింగ్​కు ఎప్పుడూ వ్యతిరేకమే.

అవతలి వ్యక్తికి చెప్పకుండా సంభాషణ రికార్డ్ చేయడం ద్వారా యూజర్ల వ్యక్తిగత గోప్యతకు భంగం కలుగుతుందన్నది గూగుల్ వాదన. అందుకే కాల్ రికార్డింగ్ యాప్స్​ కట్టడికి ఎప్పటినుంచో ప్రయత్నిస్తోంది. ఆండ్రాయిడ్ 6 ఓస్​ తెచ్చినప్పుడు ఈ యాప్స్​పై తొలిసారి వేటు వేసింది గూగుల్. కాల్ రికార్డింగ్​కు వీలు కల్పించే ఏపీఐని తొలగించింది. అయితే.. యాప్ డెవలపర్లు ప్రత్యామ్నాయాలపై దృష్టిపెట్టారు. సరికొత్తగా మళ్లీ కాల్ రికార్డింగ్ యాప్స్​ తీసుకొచ్చారు. ఆండ్రాయిడ్​​ 9 ఓఎస్​లో వాటికీ కళ్లెం వేసింది గూగుల్. అయితే.. ఆండ్రాయిడ్ యాక్సెసబిలిటీ ఏపీఐని ఉపయోగించి కొందరు యాప్ డెవలపర్స్​ మళ్లీ కాల్ రికార్డింగ్ ఆప్షన్ తీసుకొచ్చారు. ఇప్పుడు దీనిపై వేటు వేస్తోంది గూగుల్.

కాల్ రికార్డింగ్ ఇక అసాధ్యమా?: గూగుల్ వర్గాల ప్రకారం.. మే 11 నుంచి థర్డ్​ పార్టీ యాప్స్​ ద్వారా కాల్​ రికార్డింగ్​ కుదరదు. గూగుల్ డయలర్ లేదా స్మార్ట్​ఫోన్​ తయారీ సంస్థ డిఫాల్ట్​గా ఇచ్చే డయలర్​(ఉదాహరణకు ఎంఐ డయలర్) ద్వారా మాత్రమే కాల్ రికార్డింగ్ ఫీచర్ అందుబాటులో ఉంటుంది. అయితే.. గూగుల్ డయలర్​ ద్వారా ఎవరైనా ఈ ఫీచర్ ఉపయోగిస్తుంటే.. అవతలి వ్యక్తికి కూడా తెలిసేలా 'ఈ కాల్ రికార్డ్ అవుతుంది' అని అలర్ట్ వస్తుంది. దీంతో అవతలి వ్యక్తి కూడా అలర్ట్ కావచ్చు. దీంతో ఎవరి వ్యక్తిగత గోప్యతకు భంగం కలగకుండా గూగుల్ చర్యలకు ఉపక్రమించింది.