కూకట్ పల్లి షంశీగూడలో తల్వార్లతో రౌడీ ముఠా హల్ చల్.!

Posted: 03/14/2022 05:05 PM IST

తెలంగాణలో యువతను సక్రమైన బాట పట్టేలా ప్రభుత్వం, పోలీసులు చేస్తున్న కృషికి తూటాలు పోడుతూ.. ఓ రౌడీ గ్యాంగ్ తమ రౌడీయిజాన్ని ప్రదర్శించగా, వారికి చిరువ్యాపారులు అందరూ కలసి గట్టిగానే బుద్ది చెప్పారు, ఓ రౌడీ రోడ్డుపై వెళ్తూ. నేరుగా కొబ్బరిబొండాం అమ్ముకునే చిరువ్యాపారి వద్దకు వచ్చి బొండాలు తాగారు. డబ్బులు అడిగే సరికి వారు సైకోలా మారిపోయారు. దురలవాట్లు, చెడు సహవాసాలు, తన చుట్టూ ఉన్న వాతావరణం కూడా ఇందుకు ఓ రకంగా కారణమే.. కొబ్బరి బోండాలు తాగాక డబ్బులు అడిగినందుకు బండి యజమానిపై దాడికి దిగారు కొందరు యువకులు. సినిమా స్టైల్​లో రౌడీయిజం చేస్తూ.. కత్తులు, కర్రలతో దాడికి దిగారు.

తెలంగాణలోని కూకట్​పల్లి షంశీగూడ నాలా వద్ద కొంతకాలంగా నరేందర్ అనే వ్యక్తి​ కొబ్బరి బోండాల దుకాణం నడుపుతున్నాడు. ఆదివారం సాయంత్రం యువకుడు కుల్దీప్​ సింగ్​.. ఇద్దరు స్నేహితులతో రోడ్డుమీద వెళ్తూ.. దారిలో ఈ కొబ్బరి బోండాల బండి దగ్గర ఆగారు. బోండాలు తీసుకున్నారు. దాహం తీరేలా తాగారు. అనంతరం బండి యజమాని బోండాల డబ్బులు అడిగారు. ఇంతలో ఆ యువకులకు ఏమైందో ఏమో.. ఒక్కసారిగా అతనిపై కత్తులు, కర్రలతో దాడికి దిగారు. మమ్మల్నే డబ్బులు అడుగుతావా? అంటూ దాడికి పాల్పడ్డారు. అంతటితో ఆగక.. రాధాకృష్ణ, హర్దీప్​ సింగ్​ అనే మరో ఇద్దరిని తీసుకొచ్చి ఘర్షణకు దిగారు.

ఇదంతా అక్కడుండి గమనిస్తున్న స్థానికులు, పరిసరాల్లోని చిరు వ్యాపారులు చూస్తూ ఊరుకోలేదు. రౌడీయిజానికి దిగిన యువకులపైకి తిరగబడ్డారు. బుద్ధిగా వ్యాపారం చేసుకుంటున్న అతనిపై దాడిని ఖండిస్తూ.. కర్రలతో వారిని తరిమితరిమి కొట్టారు. దారిలో రాకపోకలు సాగించే ప్రయాణికులు ఆ సంఘటనను చోద్యంలా చూస్తుండగా.. మరికొందరు భయాందోళనకు గురయ్యారు. మరికొందరు తమ చరవాణీల్లో ఈ దృశ్యాలను రికార్డు చేశారు. సమాచారం అందుకున్న పోలీసులు.. ఘటనాస్థలికి చేరుకున్నారు. కేసు నమోదు చేసి దర్యాప్తు చేస్తున్నారు. పాత కక్షలు ఏమైనా ఉన్నాయా కోణంలో విచారణ చేస్తున్నారు.