ITEMVIDEOS: న్యూజీలాండ్ సూపర్ మార్కట్లో ఉగ్రదాడి.. ఆరుగురిని గాయపర్చిన ఐసిస్ ఉన్మాది

Posted: 09/03/2021 04:39 PM IST

Isis inspired terrorist shot dead after he stabs 6 in new zealand pm

న్యూజిలాండ్ లోని ఆక్లాండ్ లో ఉన్న ఓ సూప‌ర్ మార్కెట్ లో ఇవాళ ఉగ్ర‌దాడి జ‌రిగిన‌ట్లు ఆ దేశ ప్ర‌ధాని జెసిండా ఆర్డెర్న్ తెలిపారు. ఆరుగురిన్ని క‌త్తితో పొడిచిన ఆ ఉన్మాదిని పోలీసులు మ‌ట్టుబెట్టిన‌ట్లు ఆమె వెల్ల‌డించారు. శ్రీలంకకు చెందిన‌ ఐఎస్ఐఎస్ ప్రేరేపిత ఉగ్ర‌వాది ఈ దాడికి పాల్పడిన‌ట్లు ఆమె చెప్పారు. క‌త్తిదాడి జ‌రిగిన 60 సెక‌న్ల లోపే ఆ ఉన్మాదిని హ‌త‌మార్చిన‌ట్లు ప్ర‌ధాని జెసిండా తెలిపారు. దాడికి పాల్ప‌డిన వ్య‌క్తి 2011లో న్యూజిలాండ్ కు వ‌చ్చాడ‌ని, 2016 నుంచి అత‌నిపై జాతీయ భ‌ద్ర‌తా ద‌ళం నిఘా పెట్టిన‌ట్లు ఆమె చెప్పారు. ఆ ఉన్మాది భావ‌జాలం విప‌రీతంగా ఉన్న నేప‌థ్యంలో అత‌నిపై నిఘా పెట్టిన‌ట్లు జెసిండా తెలిపారు.

ఇస్లామిక్ స్టేట్ ప్రేరేపిత ఉన్మాది సూప‌ర్ మార్కెట్ లో క‌త్తితో బీభ‌త్సం సృష్టించిన‌ట్లు ప్ర‌త్య‌క్ష సాక్షులు తెలిపారు. ఉన్మాది దాడి నుంచి తప్పించుకునేందుకు ఆ సూపర్ మార్కెట్ లో వున్న కస్టమర్లు సిబ్బంది ప్రాణాలను అరచేతిలో పెట్టుకుని అటూ ఇటూ ప‌రుగులు తీశార‌న్నారు. ఈ ఘటనతో ఒక్కసారిగా సూపర్ మార్కెట్లో భీతావాహ వాతావరణం అలుముకుందని, కస్టమర్లు అరుపులు, కేక‌లు పెట్టార‌న్నారని ప్రత్యక్ష సాక్షులు తెలిపారు. ఓ వ్య‌క్తి క‌త్తిపోట్ల‌తో కింద‌ప‌డిపోయిన‌ట్లు ఒక‌రు తెలిపారు. న్యూ లిన్ ప్రాంతంలో ఉన్న లిన్ మాల్ నుంచి జ‌నం భ‌యంతో ప‌రుగులు తీస్తున్న వీడియోలు ఆన్ లైన్‌లో వైర‌ల్ అయ్యాయి.

కాగా ఈ దాడిలో గాయపడిని ఆరుగుర్ని ఆసుపత్రికి తీసుకువెళ్ల‌గా, దాంట్లో ముగ్గురి పరిస్థితి విషమంగా ఉన్న‌ట్లు తెలుస్తోంది. ఐసిస్ సిద్ధాంతాల‌ను ప్రోత్స‌హిస్తున్న ఆ ఉన్మాదికి ఇటీవ‌ల 12 నెల‌ల శిక్ష ప‌డింది. అభ్యంత‌ర‌క‌ర వ‌స్తువుల‌ను క‌లిగి ఉన్న కేసులో ఆ శిక్ష‌ను విధించారు. కేవ‌లం ముస్లింను కావ‌డం వ‌ల్లే త‌న‌ను వేధిస్తున్న‌ట్లు ఆ వ్య‌క్తి కోర్టుకు తెలిపారు. అయితే ఆ వ్య‌క్తి ఇంట‌ర్నెట్ సెర్చ్‌ను పోలీసులు ప‌రిశీలించారు. దాంట్లో ఎక్కువ‌గా ఇస్లామిక్ స్టేట్ గురించి అత‌ను సెర్చ్ చేసిన‌ట్లు తెలిసింది. వాళ్లు ధ‌రించే ద‌స్తులు, జెండాలు, వాడే ఆయుధాలు, ఇస్లామిక్ హీరోలు ఎవ‌ర‌ని సెర్చ్ చేసిన‌ట్లు కూడా తెలిసింది.