జమ్మూలోని అంతర్జాతీయ సరిహద్దులో డ్రోన్ కలకలం.. పక్షం రోజుల్లో అరవది

Posted: 07/14/2021 12:56 PM IST

జమ్మూకశ్మీర్ లోని అంతర్జాతీయ సరిహద్దులో అత్యంత తక్కువ ఎత్తులో డ్రోన్ సంచారం తీవ్ర కలకలం రేపుతోంది. వెంటనే అప్రమత్తమైన భారత భద్రతా బలగాలు కాల్పులు జరపడంతో అది వెనుదిరిగింది. గ‌త‌ రాత్రి జమ్ముకాశ్మీర్ లోని ఆర్నియా అంతర్జాతీయ సరిహద్దు సమీపంలో భారత భూభాగంలోకి దాదాపు 150 మీట‌ర్ల‌మేర చొచ్చుకుని వ‌చ్చింది. ఆ ప్రాంతంలో ఎగురుతున్న డ్రోన్ ను గుర్తించిన బీఎస్ఎఫ్ జ‌వాన్లు దానిపై కాల్పులు జరపడంతో అది కొద్దిసేప‌టికే వెనుదిరిగింది. భార‌త స‌రిహ‌ద్దుల్లోని ప‌రిస్థితుల‌ను గుర్తించేందుకు లేదా ఆయుధాలు, మందు గుండు సామ‌గ్రిని జార విడిచేందుకు పాక్ ఆ డ్రోనును పంప‌డానికి ప్ర‌య‌త్నించిన‌ట్లు తెలుస్తోంది.

భారత భూభాగంలో సుమారు రెండువందల మీటర్ల ఎత్తులో అది సంచ‌రించిన‌ట్లు అధికారులు గుర్తించారు. అనంత‌రం ఆ డ్రోను తిరిగిన‌ ప్రాంతంలో గాలింపు చ‌ర్య‌లు చేప‌ట్టారు. గ‌త పక్షం రోజుల వ్య‌వ‌ధిలో ఇటువంటి డ్రోన్లు క‌న‌ప‌డ‌డం ఇది ఆరో సారి. అంతర్జాతీయ సరిహద్దు మీదుగా భారత ప్రాదేశిక భూభాగంలోకి డ్రోన్లను పంపేందుకు ప‌దే ప‌దే ప్ర‌య‌త్నాలు జ‌రుగుతున్నాయి. డ్రోన్ల ద్వారా పాకిస్థాన్ ఉగ్రవాదులు దాడులకు పాల్పడే ప్ర‌య‌త్నాలు చేస్తుండ‌డం‌తో భార‌త సైన్యం రక్షణ చ‌ర్య‌లు తీసుకుంటోంది. అయితే ఉగ్రవాదులకు పాకిస్థాన్ ప్రభుత్వ సహకారం పూర్తిగా లభిస్తోందని భారత అర్మీ వర్గాలు అరోపిస్తున్నాయి.

జ‌మ్మూక‌శ్మీర్ లోని విమానాశ్రయంలోని ఐఏఎఫ్ స్థావ‌రంపై గత కొన్ని రోజుల క్రితం డ్రోన్ల‌తో దాడి జ‌రిగిన విష‌యం తెలిసిందే. ఆ తరువాత కూడా ప‌లు ప్రాంతాల్లో డ్రోన్లు సంచ‌రిస్తూ క‌న‌ప‌డ‌డంతో వాటిపై భారత భద్రతా బలగాలు కాల్పులు జ‌రిపి త‌రిమేసాయి. ఆ తరువాత కూడా పలు డ్రోన్లు అత్యంత ఎత్తులో భారత భూభాగంలోకి చోచ్చకుని వచ్చి జమ్మూకాశ్మీర్ లోని ఎయిర్ బేస్ ల వద్ద సంచరించాయి. అయితే డ్రోన్ల ద్వారా ఆయుధాలు, మందు గుండు సామ‌గ్రి, డ్ర‌గ్స్ వంటివి జార‌విడిచే అవ‌కాశాలు ఉండ‌డంతో అవి సంచ‌రించిన ప్రాంతాల్లో జ‌వాన్లు వెంట‌నే గాలింపు చ‌ర్య‌లు చేప‌డుతున్నారు.