తెలంగాణలో పదిరోజుల పాటు సంపూర్ణ లాక్ డౌన్.. క్యాబినెట్ భేటీ నిర్ణయం

Posted: 05/11/2021 04:19 PM IST

తెలంగాణలో కరోనా ఉద్దృతి శరవేగంగా విస్తరిస్తూ రాష్ట్ర ప్రజలను కలవరానికి గురిచేస్తున్న నేపథ్యంలో ఇవాళ ముఖ్యమంత్రి కల్వకుంట్ల చంద్రశేఖర్ రావు నేతృత్వంలో భేటీ అయిన రాష్ట్ర క్యాబినెట్.. ఇవాళ కీలక నిర్ణయం తీసుకుంది. రాష్ట్రంలో నెలకొన్న పరిస్థితుల దృష్ట్యా రేపటి నుంచి పది రోజుల పాటు లాక్ డౌన్ విధిస్తూ నిర్ణయం తీసుకుంది. ఈ నెల 12 నుంచి అమల్లోకి రానున్న లాక్ డౌన్ పది రోజుల పాటు కోనసాగించాలని క్యాబినెట్ నిర్ణయం తీసుకుంది. ప్రతిరోజు ఉదయం ఆరు గంటల నుంచి ఉదయం పది గంటల వరకు అన్ని కార్యకలాపాలకు అవకాశాన్ని కల్పించింది.

ఉదయం పది గంటల తరువాత మరుసటి రోజు ఉదయం ఆరు గంటల వరకు రాష్ట్రంలో లాక్ డౌన్ నిబంధనలు అములకానున్నాయి. దీంతో జనసంచారంపై కఠిన నియంత్రణలు అమలు కానున్నాయి, తెలంగాణలో కరోనా నబంధనలు కఠినంగా అమలుకావడం లేదని, మరీ ముఖ్యంగా పాతబస్తీలో అసలు కరోనా అప్రమత్తత కూడా లేదని ఇలాంటి పరిస్థితుల్లో రాష్ట్రంలో కరోనా నిబంధనలను మరింత కఠినంగా మారుస్తున్నారా.? లేక రాష్ట్రంలో లాక్ డౌన్ విధిస్తున్నారా.? అంటూ ప్రభుత్వాన్ని రాష్ట్ర హైకోర్టు ప్రశ్నించిన వేళ.. భేటీ అయిన క్యాబినెట్.. రాష్ట్రంలో పది రోజుల పాటు లాక్ డౌన్ విధించాలని నిర్ణయించింది.

నానాటికి భయానకంగా మారుతున్న కరోనా పరిస్థితుల నేపథ్యంలో రాష్ట్రంలో లాక్ డౌన్ విధించాలని రాష్ట్రంలోని అత్యధిక ప్రజల అభిప్రాయం. రోజురోజుకు పరిస్థితులు దారుణంగా మారుతున్న క్రమంలో లాక్ డౌన్ తో కరోనా వ్యాప్తిని కట్టడి చేయవచ్చునని అభిప్రాయాలు వ్యక్తం అవుతున్నాయి. తెలంగాణ హైకోర్టుతో సహా పలువురు లాక్ డౌన్ విధించడమే సరైన మార్గమని చెబుతున్న విషయం తెలిసిందే. దేశవ్యాప్తంగా ఇప్పటికే పలు రాష్ట్రాల్లో లాక్‌డౌన్ అమల్లో ఉంది. ఈ నేపథ్యంలో తాజా కేబినెట్ భేటీలో లాక్‌డౌన్ వైపు మొగ్గు చూపారు. దీంతో కరోనా రెండవ దశ విజృంభనను కాసింత తగ్గించవచ్చునన్న అభిప్రాయాలు వ్యక్తం అవుతున్నాయి.

మే 12, బుధవారం ఉదయం 10 గంటల నుంచి పదిరోజుల పాటు లాక్ డౌన్ అమలు చేయాలని రాష్ట్ర క్యాబినెట్ నిర్ణయించింది. ప్రతిరోజూ ఉదయం 6 గంటల నుండి 10 గంటల వరకు అన్ని కార్యకలాపాలకు అవకాశం వుంటుందని నిర్ణయం తీసుకుంది. కోవిడ్ టీకా కొనుగోలు కొరకు గ్లోబల్ టెండర్లను పిలవాలని క్యాబినెట్ నిర్ణయించింది

— Telangana CMO (@TelanganaCMO) May 11, 2021