ఉపాధి కూలీగా మారిన సీపీఐ నారాయణ.. చెరువు పూడికతీత పనుల్లో..

Posted: 05/07/2021 10:53 PM IST

సీపీఐ జాతీయ కార్యదర్శి కె.నారాయణ ఉపాధి కూలీగా మారిపోయారు. తమ పార్టీని క్షేత్రస్థాయి నుంచి బలోపేతం చేసే క్రమంలో ఉపాధి కూలీలలతో మమేకమై గత రెండు రోజులుగా కూలీగా మారి శ్రమధానం చేశారు నారాయణ. నమ్మశక్యంగా లేదు కదు.. కానీ ఇదే నిజం. ఉపాధి హామీ పథకాన్ని తొలినాళ్లలో వ్యతిరేకించిన తమ పార్టీ.. ఈ పథకంతో జరిగే మంచిని గుర్తించలేకపోయిందని అన్నారు. అయితే ప్రస్తుతం ఈ పథకంతో గ్రామాల్లో చెరువుల పూడికతీతలు, ఆసుపత్రులు, పాఠశాలల నిర్మాణాలు జరుగుతుండటం సంతోషకరమని ఆయన అన్నారు. తన సొంత గ్రామమైన చిత్తూరు జిల్లా నగరి మండలంలోని అయినంబాకంలో ఆయన గ్రామస్థులతో కలసి శ్రమదానం చేశారు.

రెండు రోజులుగా సిపిఐ జాతీయ కార్యదర్శి నారాయణ స్వచ్ఛందంగా ఉపాధి పనులు చేస్తున్నారు. స్థానికంగా జరుగుతున్న ఊర చెరువు పూడికతీత పనుల్లో పాల్గొన్నారు. ఈ సందర్బంగా ఆయన మాట్లాడుతూ.. తనకు ఉపాధి పనుల్లో పాల్గొనేందుకు జాబ్ కార్డు లేదని, దీంతో శ్రమదానం చేశానని పేర్కొన్నారు. వేసవిలో ఉపాధి పనులు జరిగే చోట కూలీలకు మజ్జిగ అందించేవారని, చిన్న పిల్లల కోసం టెంట్లు వంటి ప్రత్యేక ఏర్పాట్లు ఉండేవని, కానీ ఇప్పుడు అలాంటి సదుపాయాలేమీ లేవని నారాయణ ఆవేదన వ్యక్తం చేశారు. కాగా, ఉపాధి పనులు చేస్తున్న ఆయన ఫొటోలు సోషల్ మీడియాలో తెగ వైరల్ అవుతున్నాయి.