అగ్రరాజ్యంలో మళ్లీ పంజా విసురుతున్న కరోనా.. 54 వేల మరణాలు

Posted: 04/27/2020 01:51 PM IST

Us reports 1741 deaths in 24 hours johns hopkins data

కరోనా కాటువేస్తున్న క్రమంలో అగ్రరాజ్యం అమెరికా దాని బారి నుంచి తేరుకోలేకపోతుంది. అగ్రరాజ్యంలో క్రితంరోజు మరో 1,741 మంది మృతిచెందారు. పాజిటివ్‌ కేసుల సంఖ్య పది లక్షలు దాటింది. జార్జియా, ఒక్లహామా, అలస్కా, టెక్సాస్‌ రాష్ట్రాల్లో లాక్‌డౌన్‌ మినహాయింపులతో కార్యకలాపాలు ప్రారంభమయ్యాయి. అయితే, దీనిపై ప్రజల్లో భిన్నాభిప్రాయాలు వ్యక్తమవుతున్నాయి. అమెరికన్లు ఎక్కువశాతం ‘స్టే ఎట్‌ హోమ్‌’కు మొగ్గుచూపుతున్నారని ఓ సర్వేలో తేలింది. రోగుల చికిత్సలో డిస్‌ఇన్పెక్టంట్స్‌ ఇంజెక్షన్స్‌, అతినీల లోహిత కిరణాల వినియోగంపై వ్యాఖ్యలు దుమారం రేపడంతో మీడియా సమావేశాలకు దూరంగా ఉండాలని ట్రంప్‌ నిర్ణయించారు.

అంతేకాదు ఆయనకు స్వతహాగా వుండే మీడియాపై అక్కస్సును ఆయన తన ట్విట్టర్ ద్వారా వెల్లగక్కారు. ‘వారు (మీడియా) ఎలాగూ విరుద్ధ ప్రశ్నలు అడుగుతారు. వాస్తవాలను రిపోర్ట్‌ చేయరు. వారికి మంచి రేటింగ్స్‌ రావొచ్చు. అమెరికన్లకు తప్పుడు వార్తలు తప్ప ఏ ప్రయోజనం ఉండదు. దానితో సమయం, పని వృథా’ అని ట్విటర్‌లో పేర్కొన్నారు. హ్యూస్టన్‌లో ప్రవాస భారతీయలు నడుపుతున్న ‘సేవా ఇంటర్నేషనల్‌’ సంస్థ 30 వేల మాస్క్‌లు, గ్లోవ్స్‌, 20 వేల ఔన్స్‌ల శానిటైజర్‌ను ఆస్పత్రులు, అధికారులకు పంపిణీ చేసింది. రష్యాలో రికార్డు స్థాయిలో 6,361 కేసులు నమోదయ్యాయి. 66 మంది చనిపోయారు. మొత్తం సంఖ్య 747కు చేరింది.

నెలలో అత్యల్పంగా.. యూకేలో 413 మంది మృతి చెందారు. ఆఫ్రికా ఖండంలో కేసులు 30 వేలు దాటాయి. 1,374 మంది ప్రాణాలు కోల్పోయారు. తాజా 60 మందితో కలిపి ఇరాన్‌లో మృతుల సంఖ్య 5,710కి చేరింది. సింగపూర్‌లో కేసులు 13 వేలను దాటాయి. కొత్తగా 931 మంది వైరస్‌ బారినపడ్డారు. ఢాకాలోని 31 మంది ఇస్కాన్‌ ఆలయ సిబ్బంది కరోనా సోకింది. పరీక్షలు, చికిత్స అందించే సామర్థ్యం లేకపోవడంతో.. 3,200 మంది భారతీయులను పంపించేందుకు హాంకాంగ్‌ సిద్ధమైంది. కరోనాతో చనిపోనప్పటికీ.. ముగ్గురు ప్రవాసుల మృతదేహాలను వెనక్కు పంపడంపై యూఏఈలోని భారత రాయబారి పవన్‌ కపూర్‌ ఆవేదన వ్యక్తం చేశారు.