యస్ బ్యాంకు సంక్షోభం: వ్యవస్థాపకుడి ఇంటిపై ఈడీ దాడులు

Posted: 03/07/2020 11:44 AM IST

Yes bank crisis ed registers money laundering case against rana kapoor

తీవ్ర అర్థిక సంక్షోభంలో చిక్కుకుని విలవిల్లాడుతున్న ప్రైవేటు రంగ యస్ బ్యాంకు వ్యవహారం ఇప్పుడు దేశవ్యాప్తంగా చర్చనీయాంశమైంది. తమ డిపాజిట్లపై ఖాతాదారులు ఆందోళన చెందుతున్న వేళ.. ఆ బ్యాంకు వ్యవస్థాపకుడు రాణా కపూర్ నివాసంలో నిన్న రాత్రి ఈడీ సోదాలు నిర్వహించింది. డీహెచ్ఎఫ్ఎల్‌కు యస్ బ్యాంకు ఇచ్చిన రుణాలు నిరర్థక ఆస్తులుగా మారడం వెనక కపూర్ పాత్ర ఉందన్న అనుమానాలు వ్యక్తమవుతున్నాయి. మరో కార్పొరేట్ సంస్థకు ఇచ్చిన రుణాల్లోనూ కపూర్ పాత్ర ఉందని అనుమానిస్తున్నారు. తీసుకున్న రుణాలకు ప్రతిఫలంగా ఆ సంస్థ నుంచి కొంత సొమ్ము కపూర్ భార్య ఖాతాల్లోకి చేరినట్టు అభియోగాలు ఉన్నాయి.

ఈ నేపథ్యంలోనే ఆయన నివాసంలో ఈడీ దాడులు నిర్వహించినట్టు తెలుస్తోంది. యస్ బ్యాంకు ప్రస్తుత పరిస్థితికి ఇది కూడా ఓ కారణమన్న ఆరోపణలు వినిపిస్తున్నాయి. కాగా, ఆయన మాత్రం తనకు బ్యాంకు ఇంతటి నష్టాల్లోకి జారుకుందన్న విషయం తెలియదని అన్నారు. తాను ఎంతో కష్టపడి పదేళ్ల కాలంలో బ్యాంకును ఉన్నతస్థాయికి తీసుకువచ్చినట్లు చెప్పారు. ఇప్పుడు ఎస్ బ్యాంకు పరిస్థితుల గురించి వింటుంటే విస్మయం కలుగుతోందని అన్నారు. ఎస్ బ్యాంకులో తన చివరి వాటాను 2019 నవంబరులో అమ్మేశానని తెలిపారు.

అంతకుముందు నుంచే తనకు సంస్థతో ఎలాంటి సంబంధాలు లేవని స్పష్టం చేశారు. ఎస్ బ్యాంకులో ఇంత జరుగుతోందన్న విషయం తనకు తెలియదని ఆశ్చర్యం వ్యక్తం చేశారు. అయితే యస్ బ్యాంకు సంక్షోభంలో కూరుకుపోవడంతో దేశవ్యాప్తంగా ఉన్న ఖాతాదారుల్లో తీవ్ర ఆందోళన కలిగిస్తోంది. తమ డిపాజిట్లు ఏమైపోతాయోనన్న అనిశ్చితి వారిలో అంతకంతకు పెరుగుతోంది. డిపాజిటర్లకు ఎలాంటి నష్టం జరగదని కేంద్ర ఆర్థిక శాఖ మంత్రి నిర్మలా సీతారామన్ స్వయంగా వెల్లడించడం వారికి కాస్త ఊరటనిచ్చింది.