మరో వైమానిక దాడి.. మరో టాప్ కమాండర్ లక్ష్యంగా..

Posted: 01/04/2020 12:26 PM IST

బాగ్దాద్‌ ఇంటర్నేషనల్ ఎయిర్ పోర్టుపై వైమానిక దాడికి పాల్పడి ఇరాన్‌ సైనిక ఉన్నతాధికారి ఖాసీం సులెమాన్ ను హతమార్చి 24 గంటలు కూడా కాకముందే మరోమారు అగ్రరాజ్యం అమెరికా ఇరాన్ పై వైమానిక దాడులకు పాల్పడింది. ఇరాన్ మద్దతున్న పారామిలిటరీ బలగాల కాన్వాయ్ పై తెల్లవారుజామున దాడులకు పాల్పడింది. ‘హబీబ్ అల్ షాబీ’ కమాండర్ ను లక్ష్యంగా చేసుకుని ఈ దాడులు జరిగాయని వార్తలు వినిపిస్తున్నాయి. అయితే బాగ్దాద్ సమీపంలోని తాజీ స్టేడియం వద్ద జరిగిన ఈ వైమానిక దాడులకు ఇప్పటివరకు ఎవరు బాధ్యత వహించలేదు.

కాగా తాజీ స్టేడియం వద్ద దాడులకు తాము పాల్పడలేదని అమెరికా అధికారి తెలిపారు. ఇస్తామిక్ స్టేట్ ఉగ్రవాదానికి వ్యతిరేకంగా తాము పోరాటం చేస్తున్నామని కానీ.. ఉత్తర బాగ్దాద్ ప్రాంతంలోని తాజీ స్టేడియం వద్ద జరిగిన దాడులకు తమకు సంబంధం లేదని అన్నారు. గత కొంతకాలంగా క్యాంప్ తాజీ వద్ద తాము ఎలాంటి వైమానిక దాడులకు పాల్పడలేదని అమెరికాకు చెందిన అధికారి తన ట్విట్టర్ ఖాతాలో పేర్కోన్నారు. కాగా, తాజీ క్యాంపు వద్ద వైద్యులను తీసుకుని వెళ్తున్న మూడు వాహనాల్లో రెండు వాహనాలను ధగ్ధమయ్యాయని ఐరాన్ వర్గాలు తెలిపాయి.

ఈ ఘటనలో ఆరుగురు ప్రాణాలు కోల్పోయినట్లు సమాచారం. ఇరాన్‌ ఉన్నత స్థాయి కమాండర్‌ జనరల్‌ ఖాసిం సులేమానీపై శుక్రవారం జరిపిన దాడిలో హషీద్‌ అల్‌ షాబీ డిప్యూటీ కమాండర్‌ అబు మహదీ అల్‌ ముహందిస్‌ మృతి చెందిన  విషయం తెలిసిందే. ఇదే దళానికి చెందిన కమాండర్ ను లక్ష్యంగా చేసుకొని తాజా దాడి జరిగినా.. ఇరాన్ టీవీ మాత్రం సీనియర్ వైద్యులతో వెళ్తున్న వాహనాలపై దాడి జరిగినట్లు పేర్కోంది.

మరోవైపు శుక్రవారం నాటి దాడుల్లో మరణించిన ‘ఇరాన్‌ రివల్యూషనరీ గార్డ్స్ కమాండోలు‌, ‘హషీద్ అల్‌ షాబీ’ దళ సభ్యులకు ఇరాక్ లోని ఇరాన్‌ మద్దతుదారులు నేడు సంతాపయాత్ర నిర్వహించేందుకు సన్నాహాలు చేస్తున్నారు. అనంతరం మృతదేహాల్ని ఇరాన్‌కు అప్పగించనున్నారు. దాడి తరవాత పశ్చిమాసియాలో యుద్ధమేఘాలు నెలకొన్నట్లుగా విశ్లేషకులు అంచనా వేస్తున్న తరుణంలో ఈ దాడి జరగడం ప్రాధాన్యం సంతరించుకుంది.