భద్రతాదళాల ఎన్ కౌంటర్లో పుల్వామా కుట్రదారుడు మృతి

Posted: 07/31/2019 12:52 PM IST

పాకిస్తాన్ తన తోక మాత్రమే కాదు తన బుద్ది కూడా వంకరేనని మరోమారు నిరూపించుకుంది. ఓ వైపు అగ్రరాజ్యం వెళ్లి ఆ దేశ ప్రధాని ఉగ్రవాదుల సంఖ్యతో పాటు ఎన్ని ఉగ్రవాద సంస్థలు వున్నాయో అన్న వివరాలను కూడా చెప్పి.. ఎలా బతుకుతామోనని అంగలార్చి.. ఇటు నియంత్రణ రేఖ వద్ద మాత్రం ఓ వైపు ఉగ్రవాదుల చొరబాట్లను ప్రోత్సహిస్తూనే.. మరో వైపు భద్రతా దళాల దృష్టి మరల్చేందుకు మరో చోట కాల్పుల విరమణ ఒప్పందానికి తూట్లు పోడుస్తున్నారు.

కాగా, పాకిస్తాన్ దొంగబుద్దిని కనిపెడుతున్న భారత భద్రతాదళఆలు మాత్రం ఉగ్రవాదుల చోరబాట్లను సమర్థవంతంగా అడ్డుకున్నాయి.  అక్రమ చోరబాట్లకు పాల్పడిన ఇద్దరు ఉగ్రవాదులను ఇండియన్ ఆర్మీ మట్టుబెట్టింది. జమ్ముకశ్మీర్‌లోని బక్తూర్ గురేజ్‌లో మంగళవారం మధ్యాహ్నం మారణాయుధాలు ధరించిన కొందరు చొరబాటుదార్లు భద్రతా దళాలపైకి కాల్పులు జరిపారు. ప్రతిగా భద్రతా దళాలు కాల్పులు ప్రారంభించాయి. ప్రస్తుతం ఇరు వర్గాల మధ్య ఎన్‌కౌంటర్ భీకరంగా జరుగుతోంది.

అనంత్‌నాగ్‌లో జరిగిన మరో ఎన్‌కౌంటర్‌లో ఇద్దరు ఉగ్రవాదులు హతమయ్యారు. వీరిలో ఒక ఉగ్రవాది జైషే మహ్మద్ ఉగ్రవాద సంస్థకు తనను తాను కమాండర్‌గా ప్రకటించుకున్నట్టు భద్రతాధికారులు తెలిపారు. ఫిబ్రవరి 14న పుల్వామాలో జరిగిన ఉగ్రదాడి వెనక హతమైన ఉగ్రవాది పంజూ అలియాస్ ఫయాజ్ అహ్మద్ థోకర్ అలియాస్ హజుల్లా బై హస్తం ఉందని, ఈ దాడిలో అతడు సహ కుట్రదారుడని ఆర్మీ తెలిపింది. పుల్వామా దాడిలో 40 మంది భారత జవాన్లు అమరులైన విషయం తెలిసిందే.