తెలుగు రాష్ట్రాల ఎమ్మెల్సీ ఎన్నికలకు నోటిఫికేషన్

Posted: 02/18/2019 08:18 PM IST

తెలుగు రాష్ట్రాల్లో ఎమ్మెల్సీ ఎన్నికలకు నగారా మోగింది. ఏపీ, తెలంగాణలో ఎమ్మెల్యే కోటాలో ఖాళీగా ఉన్న 10 ఎమ్మెల్సీ స్థానాల ఎన్నికల షెడ్యూల్ విడుదలయ్యింది. ఈ నెల 21న ఎన్నికలకు సంబంధించిన నోటిఫికేషన్ విడుదల చేస్తారు. ఈ నెల 28 నామినేషన్లకు ఆఖరుకాగా.. మార్చి 1న నామినేషన్లు పరిశీలన.. మార్చి 5న ఉపసంహరణ ఉంటుంది. మార్చి 12న ఉదయం 9 గంటల నుంచి సాయంత్రం 4 గంటల వరకు పోలింగ్ నిర్వహిస్తారు.

అదే రోజు సాయంత్రం 5 గంటలకు ఫలితాలు వెల్లడిస్తారు. తెలంగాణలో ఐదు, ఏపీలో ఐదు స్థానాలకు ఈ ఎన్నికలు జరగబోతున్నాయి. ఆంధ్రప్రదేశ్ లో మంత్రులు యనమల రామకృష్ణుడు, నారాయణ.. శమంతకమణి, ఆదిరెడ్డి అప్పారావు, శివకుమారిల పదవీకాలం పూర్తయ్యింది. దీంతో ఈ ఐదు స్థానాలకు ఎన్నిక జరగనుంది. తెలంగాణ విషయానికొస్తే.. మహమూద్ అలీ, మహ్మద్ సలీం, సంతోష్ కుమార్, షబ్బీర్ అలీ, పొంగులేటి సుధాకర్ రెడ్డిల పదవీ కాలం ముగిసింది.

ఈ ఐదు స్థానాలకు మార్చి 12న పోలింగ్ జరగనుంది. అటు ఆంధ్రప్రదేశ్ లోని ఐదు స్థానాల్లో.. ఎమ్మెల్యే సంఖ్యాబలాన్ని బట్టి టీడీపీకి నాలుగు, వైసీపీకి ఒక్క పదవి వరిస్తుంది. వైసీపీకి దక్కే ఎమ్మెల్సీని ఆ పార్టీ బీసీ నేత జంగా కృష్ణమూర్తిని వరించింది. టీడీపీ నాలుగు సీట్లను ఎవరికి కేటాయించాలనే అంశంపై కసరత్తు చేస్తోంది. ఇటు తెలంగాణ విషయానికొస్తే.. టీఆర్ఎస్‌కు నాలుగు.. కాంగ్రెస్‌కు ఒక స్థానం దక్కే అవకాశముంది.