అల్పపీడనం ప్రభావంతో.. మరో రెండు రోజులు వర్షాలు..

Posted: 01/28/2019 11:14 AM IST

బంగాళాఖాతంలో ఏర్పడిన మరో అల్పపీడనం స్థిరంగా కొనసాగుతుందని, దీని ప్రభావం మరో రెండు రోజుల పాటు కొనసాగి.. ఆ తరువాత బలహీనపడే అవకాశాలు వున్నాయిని వాతావరణ శాఖ అధికారులు వెల్లడించారు. దక్షిణ బంగాళాఖాతాన్ని ఆనుకుని హిందూ మహాసముద్రం మీదుగా ఏర్పడిన అల్పపీడన ప్రభావంతో తెలుగు రాష్ట్రాల్లో ఒక మోస్తారు నుంచి పలుచోట భారీ వర్షాలు కురిసే అవకాశం వుందని వాతావరణ కేంద్ర అధికారులు తెలిపారు.

ఆగ్నేయ ప్రాంతంలో అండమాన్ వద్ద ఏర్పడిన ద్రోణి అల్పపీడనంగా మారినట్టు వివరించారు. తూర్పు విదర్భ, దాని పరిసర ప్రాంతాల్లో సముద్రమట్టానికి 1.5 కిలోమీటర్ల ఎత్తులో ఉపరితల ఆవర్తనం ఏర్పడిందని వారు వివరించారు. దీని ప్రభావం మరో రెండు రోజుల పాటు కొనసాగుతుందన్నారు. మరోవైపు తెలంగాణ మీదుగా కర్ణాటక వరకు 1.5 కిలోమీటర్ల ఎత్తున ఏర్పడిన ఉపరితల ద్రోణి బలహీనపడుతోందని, దీని ప్రభావంతో తెలంగాణలో మరో  రెండు రోజులు అక్కడక్కడ ఓ మోస్తరు వర్షాలు కురిసే అవకాశం ఉందని అధికారులు తెలిపారు.