హోదాపై నిరసనలతో లాభం లేదన్న జేసీ

Posted: 04/10/2018 08:58 AM IST

ఎప్పడు ఏం మాట్లాడతారో.. ఎప్పుడు తన మాటల నుంచి యూ టార్న్ తీసుకుంటారో.. అందుకు సింపుల్ గా మీడియా తన మాటలను వక్రబాష్యం చెప్పిందని తప్పించుకుంటారో వారే రాజకీయ నేతలు అని చెప్పడంలో అతిశయోక్తి ఏమీ లేదు. అయితే ఆంధ్రప్రదేశ్ లో కూడా ఇలాంటి రాజకీయ నేతలకు కొదవ మాత్రం లేదు. రాష్ట్రానికి ప్రత్యేకహోదాపై ఈజీగా మాటలు మార్చిన నేతలు.. యూటార్న్ తీసుకుని ఢిఫెన్స్ లో పడినా.. తమదే పైచేయి కావాలని మాత్రం చేయని ప్రయత్నాలు వుండవు.

ఆంధ్రప్రదేశ్ కు ప్రత్యేక హోదాతో పాటు రాష్ట్ర విభజన చట్టంలోని అన్ని హామీలను నెరవేర్చాలని డిమాండ్ చేస్తూ పార్లమెంటు బడ్జెట్ సమావేశాలను స్థంభింపచేసిన టీడీపీ ఎంపీలలో ఒకరైన జేసి దివాకర్ రెడ్డి.. పార్లమెంటు అవరణలో ప్లకార్డులతో ప్రదర్శనలు చేస్తున్న వైసీపీ నేతలను ఉసిగొల్పుతూ.. దమ్ముంటే రాజీనామాలు చేయాలని డిమాండ్ చేశారు. వైసీపీ నేతలు తమ పదవులకు రాజీనామాలు చేసిన నిరాహారాదీక్షలు చేస్తు్న క్రమంలో యూటార్న్ తీసుకున్న ఆయన రాజ్యసభ ఎంపీలు ఎందుకు రాజీనామాలు చేయలేదని ప్రశ్నిస్తున్నారు.

ఇక తాజాగా ప్రత్యేక హోదా కోసం పోరాడడం వల్ల ఎలాంటి ఉపయోగం లేదని మరోమారు యూటార్న్ తీసుకున్నారు. ఆంధ్రప్రదేశ్ కు ప్రత్యేకహోదా కోసం చేసే పోరాటం మొత్తం బూడిదలో పోసిన పన్నీరేనని స్పష్టం చేశారు. ఈ వాస్తవం తనకు తెలిసినా, పార్టీ అధినేత చంద్రబాబు ఆదేశాన్ని శిరసావహిస్తూ హోదా పోరాటంలో భాగమవుతున్నానని ఆయన చెప్పారు. మోదీ మొండి వైఖరి తెలిసినందువల్లే తానీరకంగా మాట్లాడుతున్నానని, ఆయన హోదా ఇవ్వరని జేసీ తేల్చి చెప్పారు. ప్రత్యేక హోదా కాకున్నా, హోదాకి సమానమైన ప్యాకేజీ ఇచ్చినా తమకు అభ్యంతరం లేదని ఆయన స్పష్టం చేశారు. చాలినన్ని నిధులు ఇస్తే, రాష్ట్ర ప్రజలను ఒప్పించే బాధ్యత తమదని ఆయన కేంద్రానికి స్పష్టం చేశారు.