ITEMVIDEOS: మళ్లి నోరుజారిన మంత్రి లోకేష్.. సెటైర్లు విసురుతున్న నెట్ జనులు

Posted: 02/06/2018 05:12 PM IST

అమెరికాలోని న్యూజెర్సీ పర్యటనలో వున్న టీడీపీ మంత్రివర్యులు, అధినేత చంద్రబాబు తనయుడు నారా లోకేష్ అక్కడ చలోక్తిగా విసిరిన పదంపై నెట్ జనులు సెటైర్లు విసురుతున్నారు. మంత్రిగా ప్రమాణస్వీకారం చేయకుముందు నారా లోకేష్ పార్టీ వ్యవహారాలను చూసుకునేవారు. అయితే ఈ క్రమంలో ఆయన పలు పర్యాయాలు నాలుక జారారు. అయితే మంత్రి అయిన తరువాత మాత్రం ఆయన ఒకటికి రెండు పర్యాయాలు అలోచించి ప్రసంగిస్తున్నారు. ఇది స్టేజ్ ఫియర్ వల్ల వచ్చిందో లేక మరేవిషయం కారణమో కానీ.. తాజాగా అమెరికాలో ఆయన విసిరిన చలోక్తిని కూడా నెట్ జనులు నోరుజారినట్లు భ్రమపడుతున్నారు.

అగ్రరాజ్యంలోని ఎన్ఆర్ఐ పార్టీ కార్యకర్తల సమావేశంలో మాట్లాడిన ఆయన పెద్ద సంఖ్యలో హాజరైన అభిమానులను చూసి.. పార్టీ కార్యకర్తలు, శ్రేణుల ఉత్సాహం, ఉత్తేజం చూస్తుంటే అమెరికాలో కూడా టీడీపీ అధికారంలోకి వచ్చేలాగుందని చలోక్తి విసిరారు. పార్టీ కార్యకర్తలలో జోష్ పేంచేందుకు నాయకులు ఇలాంటి చలోక్తులు అనేకం విసరడం కామన్. అయితే అయనకు అమెరికాలో ఓటింగ్ విధానం, సరళి గురించి తెలియక, ఏపీ తరహాలోనే ఇక్కడ కూడా వుంటుందనే ఇలాంటి వ్యాఖ్యలు చేశారని కొందరు పనిగట్టుకుని ప్రచారం చేస్తున్నారు.

నిజానికి లోకేష్ నాలుక జారలేదు.. సరికదా.. మంచి ఉద్దేశ్యంతోనే ఈ వ్యాఖ్యలు చేశారు. దీంతో కొందరు టీడీపీ నేతలు ఇలాంటి ప్రచారకర్తలపై తమదైన శైలిలో బదులిస్తున్నారు. పచ్చకామర్ల వాడికి లోకమంతా పచ్చగా కనిపిస్తుందని కౌంటర్ ఇస్తున్నారు. అయినా అమెరికాలోనే ఉన్నత విద్యను అభ్యసించిన నారా లోకేష్ కు అక్కడి బైలేటరల్ ఎన్నికల విధానం గురించి.. పోటీల గురించి తెలియక పోవడమేంటని కూడా పలువురు ప్రశ్నిస్తున్నారు.