డ్రగ్ కేసులో మరో బెదిరింపు

Posted: 08/02/2017 08:59 AM IST

డ్రగ్స్ వ్యవహారంతో దేశం చూపు మొత్తం ఒక్కసారిగా హైదరాబాద్ వైపు మళ్లింది. ముఖ్యంగా టాలీవుడ్ ప్రముఖులకు సిట్ విచారణ నేపథ్యంలో జాతీయ మీడియా సైతం ఇక్కడి వ్యవహారాలను ప్రముఖంగా ప్రచురించింది. ఈ వ్యవహారంలో ముందుగా ఎవరినీ వదిలే ప్రసక్తే లేదని డిసైడ్ అయిన తెలంగాణ సర్కార్ ఎక్సైజ్ ఎన్స్ ఫోర్స్ మెంట్ ఐజీ అకున్ సభర్వాల్ కు పూర్తి పవర్ ను కట్టబెట్టింది. ఈ క్రమంలో ఆయనకు బెదిరింపు కాల్స్ వచ్చిన విషయం తెలిసిందే. ఇక ఇప్పుడు అసలు డ్రగ్స్ దందాపై పూర్తి వివరాలు సేకరించిన ఓ జర్నలిస్టుకు కూడా ఇలాంటి బెదిరింపులే రావటం వెలుగు చూసింది.

ఓ ప్రముఖ ఆంగ్ల పత్రికకు చెందిన సదరు ఇన్వెస్టిగేషన్ జర్నలిస్ట్ తన పరిశోధనలో 'డార్క్ నెట్' సైట్ ద్వారా ఈ దందా జరుగుతోందని రాశాడు. భారత్ కు మ్యాడ్లీబూటెడ్‌ ఐడీతో ఒక పెడ్లర్ భారీగా మాదకద్రవ్యాలను సరఫరా చేస్తున్నాడంటూ కథనంలో పేర్కొన్నాడు. ఈ కథనం చదివిన సదరు డ్రగ్ పెడ్లర్... ఇంటర్నెట్ లో ఫత్వా జారీ చేశాడు. ఫేస్ బుక్ ద్వారా సదరు జర్నలిస్టు, అతని కుటుంబ సభ్యుల వివరాలు సేకరించిన వాటితో ఒక పోస్టర్ తయారు చేయించాడు. ఆ జర్నలిస్ట్ ను చంపిన వారికి నాలుగు బిట్‌ కాయిన్లు (రూ.7.2 లక్షలు), కుటుంబ సభ్యుల్ని చంపితే ఆరు బిట్‌ కాయిన్లు (రూ.10.8 లక్షలు) అందజేస్తానని వెలకట్టాడు.

ఓ స్నేహితుడి ద్వారా విషయం తెలుసుకున్న సదరు జర్నలిస్టు సిట్ అధికారులను కలిసి ఫిర్యాదు చేశాడు. దీంతో కేసు నమోదు చేసిన పోలీసులు, ఐపీ అడ్రస్ ద్వారా డ్రగ్ పెడ్లర్ ను పట్టుకునే ప్రయత్నంలో ఉన్నారు.